Bashkia e Tiranës ka hapur procedurën e prokurimit për rikualifikimin urban të një blloku në zonën e Shkozës, në Tiranë, me një fond limit prej 168 milionë e 707 mijë lekësh. Blloku që do të trajtohet kufizohet nga rrugët “Ali Shefqeti”, “Aleksandër Konda”, “Ramazan Gaxheri” dhe “Feim Ibrahimi”.
Investimi përfshin punime në infrastrukturën rrugore, ndërtimin e sistemit të ndriçimit dhe përmirësimin e kushteve të lëvizjes për banorët e zonës.
Rrugë të amortizuara dhe probleme me reshjet
Dokumentacioni i publikuar në Agjencinë e Prokurimit Publik tregon se një pjesë e konsiderueshme e rrugëve të brendshme të bllokut janë të amortizuara. Në dokumentet teknike përmenden dëmtime të shtresave asfaltike, gropa dhe çedime. Në disa segmente gjerësia e rrugës shkon nga 3 deri në 7 metra, ndërsa mungesa e një infrastrukture të përshtatshme e bën të vështirë qarkullimin e automjeteve dhe lëvizjen e këmbësorëve.
Situata rëndohet gjatë periudhave me reshje, pasi rrugët me pjerrësi të madhe përballen me vërshimin e ujërave të shiut. Kjo shkakton gërryerje të trupit të rrugës dhe formimin e pellgjeve me ujë.
Akset që kërkojnë ndërhyrje
Sipas projektit, disa akse kanë nevojë për rikonstruksion të plotë. Rruga “Islam Rusi” dhe rruga “Balla” renditen në gjendje të keqe, ndërsa rrugët e tjera të bllokut kanë dëmtime të shtresave dhe probleme funksionale. Rruga “Ali Shefqeti” vlerësohet në gjendje të rregullt.
Punimet parashikojnë rikonstruksionin e segmenteve rrugore dhe përmirësimin e lidhjeve mes tyre. Ndër akset e përmendura në dokumentacion janë një rrugë me gjatësi rreth 315 metra dhe segmenti i rrugës “Aleksandër Konda” që do të trajtohet, me gjatësi rreth 145 metra.
Ndriçim i ri në të gjithë bllokun
Projekti përfshin edhe ndërtimin e një sistemi të ri ndriçimi rrugor në të gjitha rrugët e bllokut. Sipas dokumentacionit, qëllimi i investimit është krijimi i një infrastrukture rrugore që përmirëson sigurinë në qarkullim.
