Bashkia e Tiranës ka vendosur të pezullojë taksat vendore për bizneset që u dëmtuan ose u detyruan të mbyllen si pasojë e protestave të zhvilluara disa ditë më parë. Për të përfituar nga masa, subjektet duhet ta formalizojnë pezullimin dhe ta deklarojnë atë pranë strukturave vendore.
Bashkia u kërkon bizneseve të ndjekin procedurat e afishuara për llogaritjen e detyrimeve vendore gjatë periudhës kur aktiviteti i tyre ka qenë i ndërprerë.
Kostoja ekonomike e protestave
Protestat e ditëve të fundit kanë lënë pas një faturë ekonomike që përfshin dëmtimin e ambienteve dhe humbjet materiale, por edhe mbylljet e përkohshme dhe xhiron e munguar.
Hapat e parë për evidentimin e dëmeve u ndërmorën nga qeveria, e cila vuri në dispozicion të bizneseve shërbimin elektronik “Dëmi im” në portalin e-Albania. Nëpërmjet tij, subjektet mund të deklarojnë dëmtimet në ambientet tregtare dhe të dorëzojnë dokumentet që vërtetojnë humbjet.
Në të njëjtën kohë, Administrata Tatimore ka angazhuar 10 ekipe të posaçme në terren për të identifikuar bizneset e prekura dhe për të verifikuar dëmet. Informacioni i mbledhur nga raportimet dhe kontrollet do të përdoret për llogaritjen e faturës përfundimtare.
Bilanci paraprak
Deri tani janë regjistruar 127 subjekte të prekura dhe dëme në vlerën e 2.15 milionë eurove. Nga këto, 55 biznese janë evidentuar përmes kontrolleve në terren, ndërsa 72 përmes shërbimit “Dëmi im” në e-Albania. Verifikimet vazhdojnë dhe shifra mbetet paraprake.
