Protestat e ditëve të fundit kanë lënë pasoja materiale te rreth 90 subjekte tregtare, ndërsa vlera e plotë financiare e dëmeve vazhdon të mbetet e paqartë. Bilanci i dëmeve ka ardhur në rritje, sipas të dhënave të Administratës Tatimore.
Dëmet janë identifikuar përmes kontrolleve të kryera në terren, si dhe nga raportimet që vetë bizneset kanë bërë në portalin elektronik “Dëmi im”. Në disa raste, humbjet janë të ndjeshme: për një biznes të vetëm, vlera e dëmit arrin deri në 18 milionë lekë, ose rreth 190 mijë euro.
10 ekipe verifikimi në terren
Për të përcaktuar shtrirjen e dëmtimeve, Administrata Tatimore ka vënë në punë 10 ekipe të posaçme verifikimi. Këto ekipe po identifikojnë subjektet e prekura dhe po dokumentojnë dëmet e shkaktuara gjatë protestave.
Në të njëjtën kohë, bizneset mund t’i raportojnë dëmet përmes shërbimit elektronik “Dëmi im” në platformën e-Albania. Nëpërmjet këtij shërbimi, subjektet deklarojnë dëmtimet në ambientet e tyre, plotësojnë të dhënat e nevojshme dhe dorëzojnë dokumentacionin që vërteton dëmin.
Shifrat mbeten paraprake
Numri i subjekteve të dëmtuara konsiderohet paraprak dhe mund të rritet ndërsa vijojnë verifikimet dhe mbërrijnë raportime të reja. Vlera totale e dëmeve materiale ndaj bizneseve do të mund të përcaktohet vetëm pasi Administrata Tatimore të përfundojë procesin e evidentimit dhe vlerësimit.
Përveç dëmeve fizike, mbetet ende për t’u vlerësuar edhe efekti i protestave në aktivitetin ekonomik, përfshirë ndërprerjen e përkohshme të punës, xhiron e humbur dhe kostot shtesë që mund të kenë përballuar sipërmarrjet.
