Dhoma e Tregtisë dhe Industrisë Tiranë, bashkë me tetë shoqata të sipërmarrjes, ka dalë me një reagim të përbashkët pas protestave në kryeqytet, duke ngritur shqetësim për dëmet ndaj pronës publike dhe private, përfshirë institucione, banka, qendra tregtare dhe objekte biznesi.

Në deklaratën për shtyp, përfaqësuesit e biznesit pranojnë se protesta paqësore është një e drejtë themelore, të cilën institucionet shtetërore duhet ta garantojnë. Megjithatë, ata nënvizojnë se dhuna dhe shkatërrimi i pronës nuk mund të pranohen. Sipas tyre, dëmet ndaj bizneseve nuk godasin vetëm pronarët, por edhe punonjësit, klientët dhe ekonominë e qytetit në tërësi.

“Bizneset, punonjësit dhe pronat e tyre nuk mund të bëhen shënjestër e tensioneve politike. Pas çdo sipërmarrjeje qëndrojnë investime, vite pune, vende pune dhe familje që sigurojnë të ardhurat prej saj”, thuhet në deklaratë.

Kërkesat drejtuar policisë dhe institucioneve

Organizatat e biznesit i kërkojnë Policisë së Shtetit dhe institucioneve përgjegjëse të ndërmarrin masa parandaluese për mbrojtjen e pronës dhe garantimin e sigurisë, sidomos në zonat më të ekspozuara ndaj rrezikut. Në të njëjtën kohë, ato theksojnë se çdo ndërhyrje e policisë duhet të jetë profesionale, proporcionale dhe në përputhje me ligjin, në mënyrë që të ruhet siguria e protestuesve paqësorë, e qytetarëve dhe e punonjësve të bizneseve.

Sipërmarrja kërkon gjithashtu që autorët e akteve të dhunës të identifikohen dhe të mbajnë përgjegjësi individuale, pa u fajësuar kolektivisht ata që marrin pjesë në protesta paqësore. Një tjetër kërkesë ka të bëjë me dokumentimin e plotë të dëmeve dhe me një komunikim të drejtpërdrejtë mes autoriteteve dhe bizneseve të prekura, për të mundësuar ndjekjen e procedurave përkatëse.

Deklarata u drejtohet edhe organizatorëve të protestave dhe forcave politike, të cilëve u kërkohet të distancohen nga dhuna dhe të ndihmojnë në shmangien e përshkallëzimit të tensioneve.

Nënshkruesit

Reagimi mban nënshkrimin e këtyre organizatave:

  • Dhoma e Tregtisë dhe Industrisë Tiranë

  • Këshilli i Agrobiznesit Shqiptar

  • Manifaktura Shqiptare

  • Shoqata e Ndërtuesve

  • Shoqata Shqiptare e Turizmit

  • Shoqata e Industrisë së Përpunimit të Qumështit

  • Shoqata e Industrisë Ushqimore Shqiptare

  • Shoqata e Bimëve Medicinale

  • Shoqata e Grave Profesioniste Afariste dhe Zejtare