Qeveria ka hartuar një draft të parë të projektbuxhetit dhe paketës fiskale 2027 ku nuk parashikohen ndryshime në taksa për biznese, ndërkohë që paralelisht sipërmarrjet kanë nisur hartimin e kërkesave të tyre. Dhoma e Tregtisë dhe Industrisë, Tiranë, kërkon që komuniteti i sipërmarrjeve të përfshihet në mënyrë të drejtpërdrejtë në konsultimet për masat dhe ndryshimet që do të përcaktojnë paketën e re.

Ky institucion thekson se biznesi ka nevojë për siguri dhe parashikueshmëri, pasi ndryshimet në taksa dhe detyrime ndikojnë drejtpërdrejt në mënyrën se si një biznes planifikon investimet, punësimin dhe aktivitetin e tij. Sipas saj, dialogu me biznesin është pjesë e rrugës drejt standardeve europiane dhe transparenca e dëgjimi i grupeve të interesit luajnë një rol të rëndësishëm.

Për këtë arsye, Dhoma e Tregtisë dhe Industrisë Tiranë i propozon Ministrisë së Financave që draftet e Paketës Fiskale 2027 të bëhen publike përpara se të dërgohen në Kuvend, të zhvillohen takime me dhomat e tregtisë dhe shoqatat e biznesit për të diskutuar ndryshimet e propozuara, si dhe që propozimet e biznesit të shqyrtohen duke bërë të qartë se cilat prej tyre janë marrë parasysh dhe cilat jo.

Kërkesat sipas sektorëve

Kërkesat paraprake të bizneseve janë të shtrira pothuajse në të gjithë sektorët e ekonomisë. Ndër më kryesoret janë ato që lidhen me rishikimin e TVSH-së për industrinë agroushqimore, ku propozimi është që TVSH për produktet e shportës të jetë jo më shumë se 5-7%.

  • Propozohet të bëhet zero TVSH për fertilizantët.
  • Kërkohet të përjashtohet nga TVSH importi i makinerive që përdoren për industrinë prodhuese.
  • Bizneset propozojnë përjashtimin nga tarifat doganore për lëndët e para që shërbejnë në industrinë agroushqimore.
  • Kërkohet rimbursimi i akcizës për gazin dhe lëndët djegëse.

Gjithashtu, sugjerohet ndryshim i skemës së mbështetjes në bujqësi, ku për çdo litër qumësht kërkohet të ketë subvencion të drejtpërdrejtë për fermerin, ndërsa nënvizohet se pragu i TVSH prej 10 milionë lekësh bën që shumica e produkteve të shiten pa TVSH. Nga ana tjetër, bizneset kërkojnë mbështetje fiskale dhe financiare në përmbushje të standardeve të BE.

Sa i takon tregut të pasurive të paluajtshme, pavarësisht periudhës kur po aplikohet procesi i rivlerësimit, sugjerohet rishikimi i tatimit për shitjen e pasurive të paluajtshme, i cili aktualisht është në nivelin 15%.