Komisioni Qendror i Zgjedhjeve (KQZ) ka hapur një tender me fond limit 34.8 milionë lekë, rreth 380 mijë euro, për vënien në punë të sistemit të kamerave në qendrat e votimit, si pjesë e përgatitjeve teknike për zgjedhjet vendore të vitit 2027. Tenderi është rishpallur, pasi një procedurë e mëparshme me të njëjtin fond limit ishte anuluar.
Sipas dokumentacionit të prokurimit, projekti synon përgatitjen e pajisjeve të regjistrimit për 5,225 qendra votimi në mbarë vendin. Fondi nuk do të shkojë për zëvendësimin e plotë të kamerave aktuale, por kryesisht për riparimin, konfigurimin dhe përshtatjen e tyre për procesin zgjedhor.
Çfarë parashikon investimi
- Blerjen e 137 kamerave të reja;
- Blerjen e 600 baterive dhe 52 kartave të memories;
- Riparimin e 412 blloqeve të furnizimit me energji;
- Riparimin e 35 strukturave metalike.
Standardet për ditën e votimit
Dokumentet përcaktojnë kushte të qarta funksionimi. Kamerat duhet të jenë në gjendje të regjistrojnë të paktën 14 orë, ndërsa bateritë rezervë duhet të sigurojnë vijimin e regjistrimit për dy orë në rast se ndërpritet energjia elektrike.
Kompania fituese duhet gjithashtu të garantojë që çdo pajisje me defekt të zëvendësohet brenda dy orësh gjatë procesit të votimit. Kamerat do të pozicionohen në mënyrë që të regjistrojnë procesin pa cenuar fshehtësinë e votës.
Përveç kësaj, kontrata mbulon transportin e pajisjeve drejt komisioneve zonale, mbështetjen teknike gjatë ditës së zgjedhjeve dhe administrimin e pamjeve filmike pasi të përfundojë votimi.
