Bizneset e sektorit të hoteleri-turizmit në Korçë e kanë pritur me shqetësim paketën e re fiskale të prezantuar nga qeveria shqiptare, e cila parashikon, mes të tjerash, rritjen e taksave, veçanërisht për operatorët e këtij sektori. Në qytetin ku turizmi konsiderohet burimi kryesor i të ardhurave për Korçën dhe për gjithë rajonin e juglindjes, rritja e barrës tatimore perceptohet si rrënim për aktivitetin.
Tri ndryshime që prekin sektorin
Bujar Muço, kryetar i SHBVM-së, i rendit ndryshimet që sipas tij godasin drejtpërdrejt turizmin:
“Është një goditje e drejtpërdrejtë për këtë aktivitet. Janë dy kategori që goditen, në radhë të parë TVSH nga 6% shkon në 10%, ngrihet dividenti nga 15% në 18% ndërsa tatimi i fitimit bëhet 17%”.
Ai e cilëson momentin si të papërshtatshëm për këto masa, duke përmendur shpopullimin e vendit dhe karakterin sezonal të turizmit malor në zonë, i cili përqendrohet kryesisht në fundjavë.
“Është koha jo e duhur për të bërë këtë. Ka një shpopullim të madh të vendit. Korça ka ka turizëm malor, por vetëm në fundjavë. Unë besoj se do të ketë rrudhje të turizmit. Pronarët do të rrisin çmimet dhe do të ketë më pak turistë”.
Apel për dialog para miratimit
Meqë paketa fiskale nuk është miratuar ende, nga Shoqata e Biznesit të Mesëm dhe të Vogël vjen edhe një thirrje drejtuar qeverisë:
“Është akoma në kohë qeveria ta diskutojë edhe me grupet e interesit dhe ekspertët dhe të bëjë hapat e duhur për ta nxitur ekonominë dhe turizmin”.
