Qeveria ka vendosur të ulë pragun e regjistrimit të detyrueshëm në TVSH nga 10 milionë në 5 milionë lekë xhiro në vit, duke u tërhequr nga premtimi i mëparshëm se lehtësia për bizneset e vogla do të qëndronte në fuqi deri në vitin 2029. Duke nisur nga 1 janari 2027, çdo biznes me qarkullim vjetor mbi 5 milionë lekë do të detyrohet të paguajë TVSH-në, e cila tashmë parashikohet në masën 21%.

Bizneset me xhiro deri në 10 milionë lekë në vit kanë qenë të përjashtuara nga ky detyrim që prej janarit 2021.

Rritet edhe tatimi mbi fitimin

Paketa e re fiskale rëndon gjithashtu bizneset e mëdha, ato me xhiro mbi 14 milionë lekë. Tatimi mbi të ardhurat e korporatave, i njohur si tatimi mbi fitimin, do të rritet nga 15% që është aktualisht në 17% duke filluar nga viti i ardhshëm.

Reagimi i sipërmarrjes

Dhoma e Tregtisë dhe Industrisë Tiranë i ka kundërshtuar ndryshimet, duke paralajmëruar për kosto shtesë për sektorin privat:

“Efekti neto është mbi 10 miliardë lekë të ardhura shtesë në vit, pjesa më e madhe e të cilave do të paguhej nga biznesi. Për ndryshimet në tatimin mbi pagat nuk është bërë publik asnjë vlerësim. Kjo paketë vjen në momentin më të gabuar. Karburantet po shtrenjtohen, kostot e prodhimit mbeten të larta dhe rënia e euros po gërryen të ardhurat e eksportuesve dhe të turizmit. Ekonomia ka nevojë për një paketë fiskale nxitëse, jo për barrë të re”.

Shqetësime të ngjashme ngrihen edhe nga zëra të tjerë të sipërmarrjes:

“Paketa e re fiskale pritet të rrisë barrën tatimore për bizneset, duke lënë më pak fonde për investime dhe duke shtuar presionin mbi çmimet. Ulja e pragut të regjistrimit të detyrueshëm në TVSH nga 10 në 5 milionë lekë qarkullim vjetor do të përfshinte më shumë biznese të vogla në këtë skemë, duke u shtuar detyrimet për deklarim dhe administrim. Zëri i sipërmarrjes duhet të dëgjohet përpara çdo vendimmarrjeje me karakter ekonomik.”

Pasojat e mundshme

Nëse ndryshimet miratohen, fitimi pas tatimit i bizneseve do të pakësohej, bashkë me fondet që ato kanë në dispozicion për investime dhe modernizim të prodhimit. Rritja e TVSH-së mund të shtojë presionin mbi çmimet ose mbi marzhet e fitimit, duke vënë në rrezik kërkesën dhe konkurrueshmërinë, sidomos në sektorin e turizmit.