Confindustria Albania, Shoqata e Industrialistëve Italianë në Shqipëri, ka kundërshtuar hapur propozimet për rritjen e taksave në Paketën Fiskale 2027, duke i kërkuar qeverisë të tërheqë ndryshimet e parashikuara në draft dhe të sqarojë arsyet që e kanë shtyrë drejt tyre. Shoqata është kundër rritjes së tatimit mbi fitimin nga 15% në 17%, të tatimit mbi dividendin nga 8% në 15% dhe të TVSH-së standarde nga 20% në 21%, duke paralajmëruar se masat do të ndikojnë te investimet, punësimi dhe pagat.

Zotimi i qeverisë për tatimin mbi fitimin

Në komunikatën e saj për shtyp, shoqata vë në dyshim respektimin e angazhimit të mëparshëm të qeverisë, sipas të cilit norma 15% e tatimit mbi fitimin për biznesin e madh nuk do të ndryshonte gjatë mandatit qeverisës. Me draftin e ri, kjo normë parashikohet të shkojë në 17%.

“Qeveria duhet të shpjegojë pse po tërhiqet nga fjala e dhënë”

Me këtë deklaratë, Confindustria Albania kërkon transparencë për nevojën e këtyre ndryshimeve, si dhe për alternativat që janë marrë në shqyrtim përpara se barra financiare t’u ngarkohet sërish bizneseve dhe qytetarëve.

Suficiti buxhetor dhe investimet e parealizuara

Shoqata u referohet të dhënave të Ministrisë së Financave për periudhën janar-shtator 2026. Sipas tyre, të ardhurat buxhetore i kanë kaluar shpenzimet me rreth 70.3 miliardë lekë, ndërsa investimet publike janë realizuar në masën 75.2% të planit për këtë periudhë.

Confindustria pranon se ky suficit nuk është rezultati përfundimtar i vitit dhe nuk vërteton se të gjitha fondet janë të lira për përdorim. Gjithsesi, sipas saj, këto shifra kërkojnë një shpjegim të qartë nga qeveria pse duhet rritur në mënyrë të përhershme barra fiskale, kur një pjesë e investimeve dhe shpenzimeve të planifikuara ende nuk është kryer.

“Përpara se të kërkojë më shumë para, shteti duhet të japë llogari për administrimin dhe përdorimin e atyre që mbledh”

Barra e kombinuar mbi kapitalin rritet me rreth 35%

Një nga shqetësimet kryesore të shoqatës lidhet me efektin e ndryshimeve mbi kapitalin dhe vendimet për investime. Sipas llogaritjeve të Confindustria Albania, për një kompani që tatohet me normën standarde dhe shpërndan të gjithë fitimin e mbetur pas tatimit, barra e kombinuar e tatimit mbi fitimin dhe mbi dividendin do të rritej nga 21.8% në 29.45%.

Në praktikë, kjo nënkupton që për çdo 100 lekë fitim para tatimit, shteti do të merrte 7.65 lekë më shumë, çka përbën një rritje prej rreth 35% të barrës së kombinuar tatimore, sipas shoqatës.

Confindustria paralajmëron se një ndryshim i tillë mund të ulë kthimin neto nga kapitali dhe të sjellë shtyrjen, zvogëlimin ose zhvendosjen e disa investimeve drejt tregjeve të tjera. Pasojat, sipas saj, mund të shihen në projekte që nuk realizohen, vende pune që nuk hapen dhe hapësira më të ngushta për rritjen e pagave.

TVSH-ja dhe efekti te familjet

Shoqata kundërshton edhe rritjen e TVSH-së standarde nga 20% në 21% dhe kërkon një vlerësim të plotë të ndikimit që ajo do të ketë mbi konsumin dhe çmimet. Sipas Confindustria, ulja e TVSH-së për ushqimet bazë mund t’i ndihmojë familjet, me kusht që të pasqyrohet në çmimet përfundimtare. Megjithatë, qytetarët duhet të informohen për efektin neto që e gjithë paketa fiskale do të ketë mbi shpenzimet e tyre.

Kërkesat e biznesit

Confindustria Albania thekson se nuk e kundërshton nevojën për financimin e shërbimeve publike, por kërkon të dhëna për rezultatet e luftës kundër evazionit fiskal, për alternativat e zgjerimit të bazës tatimore dhe për efikasitetin e shpenzimeve publike. Sipas saj, bizneset që deklarojnë dhe paguajnë rregullisht detyrimet nuk duhet të jenë zgjidhja automatike për çdo nevojë të re buxhetore.

Si përfundim, shoqata kërkon:

  • tërheqjen e rritjeve të propozuara të taksave;
  • publikimin e një analize për ndikimin e kombinuar të masave;
  • një konsultim real me biznesin, me mundësi konkrete për të ndikuar në vendimmarrje.
“Qeveria të mbajë besën”

Me këtë thirrje mbyllet komunikata, e cila nënvizon se, ashtu siç sipërmarrjes i kërkohet të respektojë kontratat dhe detyrimet e veta, edhe qeveria duhet të përmbushë angazhimet mbi bazën e të cilave bizneset kanë vendosur të investojnë në Shqipëri.