Paketa fiskale 2027, e cila parashikon rritje të barrës tatimore për sipërmarrjen, po has në rezervat e disa shoqatave të biznesit. Përfaqësuesit e sektorit privat kritikojnë si përmbajtjen e ndryshimeve, ashtu edhe mënyrën se si janë hartuar ato, pa një konsultim të mirëfilltë me komunitetin e biznesit.
Pro-eksport Albania: barrë shtesë për industrinë fason
Shoqata “Pro-eksport Albania”, që përfaqëson industrinë fason, kërkon që të mos përsëritet praktika e vendimeve të njëanshme, të marra edhe në vitet e kaluara pa konsultim real dhe pa analizë të ndikimit në sektorët prodhues. Sipas saj, rritja e propozuar e tatimfitimit nga 15% në 17%, si dhe pothuajse dyfishimi i tatimit mbi dividendin, nga 8% në 15%, rëndojnë më tej sipërmarrjet.
Shoqata vëren gjithashtu se lehtësimi i tatimit mbi pagat nuk përfshin pagat minimale dhe ato të mesme të ulëta, ku është i përqendruar shumica e punonjësve të kësaj industrie dhe ku, sipas saj, ndërhyrja ishte më e domosdoshme.
Bashkimi i Prodhuesve Shqiptarë: 85 milionë euro më shumë në vit
Shoqata “Bashkimi i Prodhuesve Shqiptarë” kundërshton çdo ndryshim që nuk kalon përmes një konsultimi real dhe transparent me bizneset.
“Vlerësimet paraprake flasin për rreth 85 milionë euro barrë shtesë në vit nga tatimi mbi fitimin dhe dividendin, si dhe për përfshirjen e rreth 17 516 tatimpaguesve të rinj në skemën e TVSH-së”
Sipas shoqatës, nëse këto ndryshime konfirmohen, do të ulet fitimi pas tatimit dhe do të pakësohen fondet për investime dhe modernizim të prodhimit. Rritja e TVSH-së mund të rëndojë çmimet ose marzhet e fitimit, duke vënë në rrezik kërkesën dhe konkurrueshmërinë, sidomos në turizëm. Për bizneset e vogla që hyjnë në skemën e TVSH-së, shtohen detyrimet e deklarimit dhe administrimit, ndërsa mund të rritet nevoja për likuiditet.
“Pa masa efektive kundër informalitetit, barra shtesë mbi aktivitetin e deklaruar rrezikon të thellojë konkurrencën e pandershme”
theksohet në qëndrimin e shoqatës.
