Shoqata Pro-Eksport Albania ka paraqitur zyrtarisht propozimet e saj për Paketën Fiskale 2027, duke kërkuar nga Ministria e Financave dhe Ministria e Ekonomisë ulje të barrës tatimore mbi pagat dhe ndihmë konkrete për industrinë prodhuese dhe eksportuese.
Letra mban datën 19 tetor, është nënshkruar nga kryetari i shoqatës, Edvin Prençe, dhe i është dërguar për dijeni edhe Kryeministrisë dhe Komisionit Parlamentar për Ekonominë dhe Financat. Në të theksohet se shtrenjtimi i jetesës, mungesa e fuqisë punëtore dhe forcimi i lekut ndaj euros po krijojnë vështirësi serioze për prodhimin vendas, sidomos për sektorin e veshjeve dhe këpucëve.
Reforma e TAP, kërkesa kryesore
Në qendër të propozimeve është ndryshimi i Tatimit mbi të Ardhurat nga Punësimi (TAP). Shoqata kërkon që pragu i pagës së patatueshme të ngrihet në 60,000 lekë në muaj për të gjithë punëmarrësit, ndërsa tatimi të llogaritet vetëm mbi shumën që e kalon këtë kufi. Masa propozohet të hyjë në fuqi më 1 janar 2027.
Sipas Pro-Eksport Albania, ky ndryshim do të sillte rritje të pagës neto dhe të fuqisë blerëse të qytetarëve, si dhe do të ndihmonte në ruajtjen e punësimit formal dhe të konkurrueshmërisë së eksporteve shqiptare.
Mbështetje për modernizimin e industrisë
Shoqata kërkon gjithashtu që paketa fiskale të parashikojë grante për investime produktive, lehtësi tatimore dhe instrumente financiare për modernizimin e industrisë. Në mënyrë të veçantë, ajo propozon rishikimin e programit "Dyfisho Sipërmarrjen Tënde", me procedura bankare dhe kritere më të thjeshta, të cilat, sipas saj, aktualisht pengojnë shumë ndërmarrje të kenë akses në financim.
Në përfundim të letrës, Pro-Eksport Albania kërkon shqyrtimin e propozimeve, organizimin e një takimi me institucionet përgjegjëse dhe një përgjigje zyrtare, duke shprehur gatishmëri për bashkëpunim institucional.
