Çmimi i një pakete me 20 cigare në Gjermani mund të kalojë 11 euro deri në vitin 2030, pasi Bundestagu miratoi një rritje graduale të taksave për duhanin. Sot një paketë kushton mesatarisht 8.05 euro, ndërsa sipas parashikimeve çmimi do të ngjitet në 8.77 euro në vitin 2027, në 9.56 euro në 2028, në 10.42 euro në 2029 dhe në 11.36 euro në vitin 2030.
Për markat premium, çmimi i një pakete mund të arrijë deri në 14 euro. Rritja nuk kufizohet vetëm te cigaret, por përfshin edhe duhanin për dredhje dhe lëngjet për cigaret elektronike.
Miliarda euro të ardhura shtesë për buxhetin
Me këtë reformë, qeveria gjermane synon të mbledhë rreth 12 miliardë euro të ardhura shtesë nga taksat gjatë katër viteve në vijim. Vetëm për vitin 2030, të ardhurat shtesë parashikohen të arrijnë në 4.5 miliardë euro.
Industria paralajmëron për tregun e zi
Industria e duhanit ngre shqetësimin se taksat më të larta mund t’i drejtojnë konsumatorët drejt tregut të zi ose drejt blerjes së cigareve më të lira në vende të tjera të Bashkimit Europian. Sipas saj, kjo do të dëmtonte tregtarët e ligjshëm dhe mund të zvogëlonte të ardhurat që qeveria pret të arkëtojë.
Në anën tjetër, mbështetësit e reformës argumentojnë se çmimet më të larta mund ta bëjnë nikotinën më pak tërheqëse dhe të nxitin lënien e duhanit. Të dhënat e vitit 2025 tregojnë se rreth 19% e personave mbi 15 vjeç në Gjermani pinë duhan. Qendra Gjermane për Kërkimin e Kancerit vlerëson se rreth 131 mijë persona humbën jetën në vitin 2023 nga sëmundje të lidhura me duhanin.
Hapi i radhës: Bundesrati
Reforma pritet të shqyrtohet nga Bundesrati, dhoma që përfaqëson landet gjermane. Nëse miratohet, rritja graduale e çmimeve do të nisë nga viti 2027.
