Guvernatori i Bankës Kombëtare të Austrisë, Martin Kocher, zhvilloi sot një vizitë zyrtare në Bankën e Shqipërisë, në kuadër të forcimit të bashkëpunimit ndërinstitucional ndërmjet dy bankave qendrore. Sipas njoftimit zyrtar të Bankës së Shqipërisë, i parë në kontekstin e procesit të integrimit evropian, ky është një moment i rëndësishëm në thellimin e marrëdhënieve dypalëshe mes Bankës së Shqipërisë dhe Bankës Kombëtare të Austrisë. Kjo është vizita e parë zyrtare e Guvernatorit Martin Kocher në Shqipëri.
Vizita u çel me një takim dypalësh zhvilluar në ambientet e Bankës së Shqipërisë, nën kujdesin e Guvernatorit Sejko ku u diskutuan zhvillimet ekonomike dhe financiare, si edhe çështje me interes të përbashkët për sektorin bankar dhe bashkëpunimin rajonal.
Guvernatori Sejko falënderoi Guvernatorin Kocher për vizitën dhe vlerësoi marrëdhëniet e ngushta ekonomike dhe financiare mes Shqipërisë dhe Austrisë. Ai theksoi rolin e rëndësishëm të investimeve austriake në zhvillimin dhe modernizimin e ekonomisë shqiptare, veçanërisht në sektorin financiar. Gjithashtu, Guvernatori Sejko e vlerësoi Austrinë si një partner të rëndësishëm ekonomik të Shqipërisë dhe një mbështetëse e fortë e procesit të integrimit evropian të vendit.
Guvernatori Sejko evidentoi kontributin e institucioneve financiare austriake në Shqipëri, si shembull i suksesshëm i bashkëpunimit ekonomik mes dy vendeve dhe rolin e tyre në zhvillimin e ndërmjetësimit financiar dhe promovimin e praktikave bankare moderne.
Gjatë takimit, Guvernatori Sejko u ndal edhe te zhvillimet ekonomike në vend, duke theksuar se ekonomia shqiptare ka vijuar të shfaqë qëndrueshmëri dhe performancë pozitive, pavarësisht sfidave të mjedisit ndërkombëtar. Sipas tij, zgjerimi i aktivitetit ekonomik mbështetet nga konsumi, investimet, turizmi dhe një sektor bankar i shëndetshëm, ndërsa inflacioni është rikthyer pranë objektivit të Bankës së Shqipërisë.
Guvernatori shtoi se stabiliteti i konsoliduar ekonomik dhe financiar i Shqipërisë përbën një premisë inkurajuese për përballimin me sukses të goditjeve që vijnë nga rritja e çmimeve të naftës. Ai theksoi se sektori bankar mbetet i mirëkapitalizuar, likuid dhe fitimprurës, ndërkohë që kreditimi për sektorin privat vijon të zgjerohet dhe niveli i kredive me probleme mbetet në nivele historikisht të ulëta.
Në vijim, Guvernatori Sejko theksoi angazhimin e Bankës së Shqipërisë për ruajtjen e stabilitetit të çmimeve dhe të atij financiar, si edhe për modernizimin e infrastrukturës financiare dhe kuadrit mbikëqyrës.
Diskutimet u përqendruan në disa çështje kyçe për të ardhmen e sektorit financiar, përfshirë procesin e integrimit evropian të Shqipërisë dhe përafrimin e kuadrit rregullator e mbikëqyrës me standardet e BE-së, si dhe ndikimin e zhvillimeve teknologjike dhe inovacionit financiar në industrinë bankare.
Në këtë kuadër, Guvernatori Sejko vlerësoi veçanërisht rëndësinë e përvojës së Austrisë në Bashkimin Evropian dhe në Eurozonë, si një referencë e vlefshme për Shqipërinë në rrugëtimin e saj.
Në kuadër të kësaj vizite zyrtare, Banka e Shqipërisë organizoi gjithashtu një tryezë diskutimi me përfaqësues të sistemit bankar dhe drejtues të lartë të Bankës së Shqipërisë, ku u trajtuan tema me interes për sektorin financiar, përfshirë procesin e integrimit evropian, zhvillimet në tregjet financiare, mbikëqyrjen bankare dhe çështje të tjera të lidhura me modernizimin e tij.
Në fjalën e mbajtur në këtë takim, Guvernatori Kocher theksoi se besimi mbetet themeli i stabilitetit financiar në një botë gjithnjë e më të paqëndrueshme dhe shumëpolare. Ai nënvizoi se bankat qendrore, autoritetet mbikëqyrëse dhe bankat duhet të mbeten të kujdesshme, rezistente dhe me vështrimin nga e ardhmja në trajtimin e rreziqeve gjeopolitike, dobësive në tregun e pasurive të paluajtshme, si dhe përballjen me transformimin e shpejtë teknologjik dhe sfidave që lidhen me sigurinë kibernetike.
Guvernatori Kocher gjithashtu theksoi rëndësinë e tregjeve evropiane të kapitalit më të zgjeruara dhe më të integruara, duke vënë në dukje se reduktimi i fragmentimit dhe forcimi i aksesit në kapitalin sipërmarrës janë thelbësore për të mbështetur inovacionin, konkurrueshmërinë dhe rritjen afatgjatë në Evropë dhe në rajon.
Lidhur me situatën gjeopolitike, Guvernatori Kocher vuri në dukje se ndikimi mbi Evropë dhe në rajon aktualisht pritet të jetë më i kufizuar krahasuar me krizën energjetike të vitit 2022, duke theksuar njëkohësisht rëndësinë e përgatitjes dhe të administrimit të kujdesshëm të rreziqeve nga ana e bankave qendrore dhe e sektorit bankar.
Ai gjithashtu nënvizoi lidhjet e ngushta ekonomike dhe financiare ndërmjet Austrisë dhe Shqipërisë, duke nënvizuar se Austria vijon të mbështesë procesin e integrimit evropian të Shqipërisë dhe forcimin e bashkëpunimit me institucionet evropiane.
Gjatë vizitës, Guvernatori Kocher pati gjithashtu mundësinë të vizitojë ekspozitën “Paraja rrëfen: 100 vjet jetë dhe ngjarje, Banka e Shqipërisë” kushtuar 100-vjetorit të Bankës së Shqipërisë dhe monedhës kombëtare. Kjo vizitë u vlerësua si një moment simbolik që nënvizon trashëgiminë monetare dhe historike të vendit
Gjatë qëndrimit në Shqipëri, Guvernatori Kocher zhvilloi gjithashtu një takim me Kryeministrin e Shqipërisë, Edi Rama, me të cilin diskutoi rreth marrëdhënieve ekonomike mes dy vendeve, perspektivat e bashkëpunimit financiar dhe mbështetjen e Austrisë për procesin e integrimit evropian të Shqipërisë.
Postimi ” Guvernatori i Bankës së Austrisë: Kriza gjeopolitike, efekte më të kufizuara në ekonominë europiane ” eshte marre nga Revista Monitor.
