Kryeministri i Republikës së Kosovës, Albin Kurti, dhe presidentja e Komisionit Evropian, Ursula von der Leyen, zhvilluan një vizitë në ndërtesën e re të Fakultetit të Matematikës dhe Shkencave Natyrore të Universitetit të Prishtinës, duke inspektuar nga afër këtë projekt të përbashkët të arsimit të lartë.
Vlera totale e investimit në këtë objekt arrin shifrën prej 17,980,000 eurosh. Financiimi është siguruar përmes kontributit të përbashkët, ku Bashkimi Evropian ka dhënë afër 12 milionë euro (11,900,000), Universiteti i Prishtinës ka investuar 5 milionë e 80 mijë euro, ndërsa Ministria e Arsimit ka kontribuar me 1 milion euro.
Ndërtesa e re e Fakultetit të Matematikës dhe Shkencave Natyrore shtrihet në një sipërfaqe të përgjithshme prej afër 14 mijë metrash katrorë. Ky projekt, i realizuar në kuadër të marrëveshjes financiare për IPA 2020 ndërmjet Republikës së Kosovës dhe Bashkimit Evropian, u shërben rreth 2 mijë e 300 studentëve, të cilët tashmë kanë në dispozicion mjedise bashkëkohore, që nga inventari e deri te pajisjet laboratorike dhe hapësirat e bollshme përreth.
