Çmimet e naftës ranë ndjeshëm të premten pasi Irani deklaroi se kalimi i anijeve tregtare nëpër Ngushticën e Hormuzit do të jetë “plotësisht i hapur” gjatë periudhës së armëpushimit në Liban, duke zbutur frikën e tregjeve për ndërprerje të furnizimit në një nga korridoret më të rëndësishme energjetike në botë.
Deklarata u bë nga ministri i Jashtëm iranian, Abbas Araghchi, i cili tha se lundrimi tregtar do të vijojë sipas korridoreve të koordinuara nga autoritetet iraniane detare.
Reagimi në treg ishte i menjëhershëm. Sipas Reuters, nafta Brent ra në më pak se 90 dollarë për fuçi.
Rënia e çmimeve lidhet drejtpërdrejt me rëndësinë strategjike të Ngushticës së Hormuzit, nga ku kalon një pjesë thelbësore e tregtisë globale të naftës. Çdo sinjal për hapje ose bllokim të këtij korridori ndikon menjëherë në primin e rrezikut që tregu përfshin në çmim.
Reuters vë në dukje se tregu i naftës po reagon ndaj perspektivës së rikthimit të flukseve të furnizimit dhe ndaj shpresave për bisedime që mund të çojnë drejt një zbutjeje më të gjerë të konfliktit me Iranin. Deklarata e Teheranit vjen në të njëjtën ditë kur hyri në fuqi një armëpushim 10-ditor mes Izraelit dhe Hezbollahut në Liban.
Armëpushimi u pa si një hap i rëndësishëm për të frenuar përshkallëzimin rajonal, edhe pse situata mbetet e brishtë dhe janë raportuar shkelje të izoluara. Kombinimi i armëpushimit në Liban dhe sinjali nga Irani për Hormuzin, ndihmoi në uljen e tensioneve në tregjet energjetike.
Reuters thekson se çmimet ranë edhe për shkak të pritshmërive se konflikti me Iranin mund të afrohet drejt një faze negociatash. Raporti përmend se në treg është rritur optimizmi pas sinjaleve politike për afrimin e një marrëveshjeje të përkohshme, çka ka shtyrë investitorët të heqin një pjesë të primit të rrezikut që ishte krijuar nga frika e ndërprerjes së furnizimit.
Megjithatë, pavarësisht kësaj frymëmarrjeje të përkohshme, tregu mbetet shumë i ndjeshëm ndaj çdo zhvillimi të ri. Reuters nënvizon se ndonëse rënia e së premtes ishte e fortë, çmimet e naftës ende mbeten të ekspozuara ndaj paqëndrueshmërisë gjeopolitike dhe çdo dështim i armëpushimit apo tension i ri në rajon mund t’i kthejë shpejt presionet mbi treg.
Postimi ” Irani deklaron se Ngushtica e Hormuzit është “plotësisht e hapur”, nafta bie ndjeshëm ” eshte marre nga Revista Monitor.
