Çmimet e naftës u rritën me mbi 3% të hënën, pasi sulmet e reja ushtarake mes Shteteve të Bashkuara dhe Iranit rikthyen shqetësimet për transportin e energjisë përmes Ngushticës së Hormuzit.
Kontratat e së ardhmes për naftën Brent u rritën me 2.67 dollarë, ose 3.51%, në 78.68 dollarë për fuçi. Nafta amerikane West Texas Intermediate u rrit me 2.48 dollarë, ose 3.47%, në 73.89 dollarë për fuçi.
“Operatorët e transportit detar po tregohen të kujdesshëm dhe lëvizjet hyrëse janë ngadalësuar për shkak të shqetësimeve në rritje për sigurinë”, thanë analistët e ANZ.
Sulmet e reja të SHBA-së dhe Iranit gjatë fundjavës rritën frikën për një përshkallëzim të ri të konfliktit. Të dielën, Teherani goditi objektiva amerikane në rajonin e Gjirit dhe deklaroi se kishte mbyllur sërish Ngushticën e Hormuzit. Garda Revolucionare e Iranit njoftoi të hënën se kishte sulmuar baza ushtarake amerikane në Kuvajt dhe Bahrein.
Përpara nisjes së konfliktit në fund të shkurtit, përmes Ngushticës së Hormuzit kalonte rreth një e pesta e furnizimeve ditore globale me naftë dhe gaz natyror të lëngshëm (LNG).
Sipas të dhënave të monitorimit të anijeve, trafiku detar në ngushticë ra të dielën në nivelin më të ulët të pesë javëve të fundit. Sipas Kpler*, vetëm gjashtë anije kaluan përmes Ngushticës së Hormuzit gjatë së dielës.
Përshkallëzimi i sulmeve hodhi dyshime mbi të ardhmen e marrëveshjes së përkohshme SHBA-Iran, të nënshkruar muajin e kaluar, e cila synonte rihapjen e ngushticës dhe përfundimin e luftës pas 60 ditësh të tjera negociatash.
Furnizimi global me naftë u rrit me 4.1 milionë fuçi në ditë gjatë qershorit pas marrëveshjes, por mbeti 9.4 milionë fuçi në ditë nën nivelet e paraluftës, bëri të ditur Agjencia Ndërkombëtare e Energjisë në raportin e saj mujor të premten.
Presidenti amerikan Donald Trump tha të dielën se Ngushtica e Hormuzit mbetej e hapur për trafikun tregtar, pavarësisht deklaratës së mëparshme të Iranit se e kishte mbyllur rrugën ujore, pasi një anije kishte lundruar në një itinerar të paautorizuar dhe ishte goditur.
Goldman Sachs vlerësoi se zgjerimi i kapaciteteve të tubacioneve në Lindjen e Mesme mund të mbrojë mbi 60% të eksporteve të naftës nga Gjiri, në nivelet e paraluftës, nga ndërprerjet e mundshme në Ngushticën e Hormuzit deri në fund të vitit 2028.
Parashikimi bazë i bankës supozon se kapaciteti i tubacioneve që anashkalojnë Ngushticën e Hormuzit do të rritet me 3.8 milionë fuçi në ditë deri në fund të vitit 2027 dhe me 7.3 milionë fuçi në ditë në total deri në fund të vitit 2028. Kjo do ta çonte kapacitetin efektiv të anashkalimit në mbi 14 milionë fuçi në ditë deri në fund të vitit 2028.
Sasitë e naftës iraniane të mbajtura në det po rriten, pasi Teherani shtoi eksportet gjatë marrëveshjes së përkohshme të paqes me SHBA-në. Megjithatë, shitjet kanë qenë të ngadalta, pasi rafineritë e pavarura kineze janë orientuar drejt naftës më të lirë nga Iraku, Emiratet e Bashkuara Arabe dhe Katari.
Kompania Kombëtare e Naftës e Abu Dhabit caktoi çmimin zyrtar të shitjes për muajin gusht të naftës së saj referencë Murban në 80.01 dollarë për fuçi, nga 101.48 dollarë për fuçi një muaj më parë./ Reuters
*Kpler është një kompani ndërkombëtare që ofron të dhëna dhe analiza mbi tregjet e mallrave, veçanërisht për naftën, gazin natyror, LNG-në dhe transportin detar.
Postimi ” Nafta rritet me mbi 3%, ndërsa sulmet e reja kërcënojnë transportet përmes Ngushticës së Hormuzit ” eshte marre nga Revista Monitor.
