Ministri i Infrastrukturës dhe Energjisë, Enea Karakaçi, deklaroi sot nga Aeroporti Ndërkombëtar i Tiranës "Nënë Tereza" se trafiku ajror në Shqipëri pritet të rritet me rreth 18.3% në vitin 2026 krahasuar me 2025, duke arritur mbi 13.5 milionë pasagjerë. Deklarata erdhi pas njoftimit se një nga operatorët kryesorë low-cost do të shtojë linjat ajrore dhe do të zgjerojë flotën e vet në Rinas.

Operatori low-cost zgjeron aktivitetin

Ministri foli për zhvillimet në sektorin e aviacionit dhe për rritjen e aktivitetit të kompanive ajrore që operojnë në vend. Sipas tij, vendimi i operatorit për të shtuar destinacione dhe avionë është tregues pozitiv për tregun ajror shqiptar.

"Kënaqësi të isha sot në aeroportin e Rinasit, ku një nga operatorët më të rëndësishëm low cost ka njoftuar shtimin e linjave ajrore, por edhe shtimin e flotës së vet në këtë aeroport. Sigurisht ky është një sinjal shumë i mirë për aviacionin në Shqipëri, pasi vazhdojmë me rritjen e tij dhe kjo është falë edhe gjithë punës që ka bërë Qeveria Shqiptare gjatë gjithë këtyre viteve. Sigurisht kemi ecur me liberalizimin e linjave, duke futur tashmë dhe linjat që quhen low cost"

Tarifa e pasagjerit nga 10 në 1 euro

Karakaçi e lidhi këtë ecuri me politikat e qeverisë ndër vite, duke përmendur veçanërisht liberalizimin e tregut ajror dhe uljen e tarifës për pasagjerët nga 10 euro në 1 euro.

"Po ashtu kemi ulur tarifën për pasagjerët nga 10 euro në 1 euro, që sot aktualisht është ndër më të ulëtat në rajon dhe në Europë. Dhe sigurisht të gjitha këto kanë bërë të mundur që aeroporti i Rinasit të jetë më i madhi në rajon."

Trefish më shumë trafik se në 2019

Sipas ministrit, Shqipëria nuk e mat më performancën me vitin 2019, siç bëjnë shumë shtete të tjera, pasi trafiku ajror sot është mbi trefishin e atij viti. "Shifrat tregojnë që trafiku ajror i vitit 2026 parashikohet të jetë rreth 18.3% më i madh se viti 2025. Ne nuk krahasohemi fare me shifrat e vitit 2019, siç bëjnë shumë shtete të tjera, pasi në krahasim me vitin 2019, ne jemi mbi trefish të trafikut ajror", tha ai.

Ai shtoi se Albcontrol, shoqëria shtetërore e trafikut ajror, ka kryer investimet e nevojshme si në kapitalin njerëzor, ashtu edhe në teknologji, në mënyrë që kontrolli dhe navigimi i këtij trafiku në rritje të menaxhohen në mënyrën më të mirë të mundshme. Karakaçi tha gjithashtu se ishte kënaqësi për të që bisedoi me përfaqësuesit e linjës ajrore dhe të aeroportit dhe dëgjoi planet e tyre të zgjerimit.

Rritje pa incentiva financiare

Ministri vlerësoi se aviacioni në vend pritet ta vijojë rritjen gjatë vitit 2026 dhe theksoi se kjo ecuri nuk është mbështetur me subvencione publike.

"Dhe një lajm tjetër po ashtu domethënës për trafikun ajror në Shqipëri është që këto nivele që ne parashikojmë të mbyllim në vitin 2026 me përpunimin e mbi 13.5 milionë pasagjerësh, janë bërë pa asnjë incentivë mbështetëse financiare nga ana e Qeverisë Shqiptare, siç ka ndodhur dhe në shtetet e tjera"