Ministri për Evropën dhe Punët e Jashtme, Ferit Hoxha, deklaroi në Sofje se Shqipëria ka kaluar nga angazhimi politik në fazën e zbatimit konkret të Korridorit VIII. Hoxha mori pjesë në Konferencën për Korridorin VIII, e cila u organizua nga Ministrja e Jashtme e Bullgarisë, Velislava Petrova, pas takimit ministror të zhvilluar në Tiranë në shkurt, ku u përcaktua një vizion i përbashkët politik për projektin.
Sipas Hoxhës, synimi kryesor është krijimi i një korridori të vetëm dhe funksional, dhe jo thjesht një grup projektesh kombëtare të shkëputura.
Suksesi i Korridorit VIII nuk do të matet me deklarata, por me zbatimin
u shpreh ministri, duke shtuar se Shqipëria tashmë ka nisur fazën e zbatimit.
Ky aks lidh Adriatikun me Detin e Zi dhe, sipas qeverisë shqiptare, mbart rëndësi strategjike jo vetëm për sektorin e transportit, por edhe për tregtinë, energjinë dhe sigurinë rajonale. Hoxha vuri në dukje se përmirësimi i lidhjeve do të sjellë volume më të larta tregtie, kosto më të ulëta transporti, më shumë investime dhe konkurrueshmëri të shtuar.
Gjatë fjalës së tij, ai nënvizoi gjithashtu rëndësinë e infrastrukturës me përdorim të dyfishtë dhe të një koordinimi më të ngushtë ndërmjet Bashkimit Evropian dhe NATO-s për lëvizshmërinë ushtarake. Ministri kërkoi krijimin e një liste të qartë me projekte prioritare, vendosjen e afateve realiste dhe ngritjen e një mekanizmi të qëndrueshëm për monitorimin e zbatimit.
Do të bëjmë pjesën tonë për ta kthyer Korridorin VIII nga vizion në realitet u shpreh Hoxha në përfundim të konferencës së mbajtur në Sofje.
