Pesë nga figurat më të rëndësishme të ekonomisë së inteligjencës artificiale paralajmërojnë se industria po hyn në një fazë ku problemet strukturore po bëhen gjithnjë e më të dukshme. Në një panel të zhvilluar në Milken Global Conference në Beverly Hills, drejtues të kompanive që prekin çdo hallkë të zinxhirit të AI, nga çipat dhe qendrat e të dhënave te robotika dhe sistemet autonome, diskutuan mbi kufizimet që po frenojnë hovin aktual të sektorit.
Një nga temat kryesore ishte fakti se industria nuk po përballet më vetëm me mungesë fuqie kompjuterike apo çipash, por me mungesën e të dhënave reale. Qasem Younis, CEO i Applied Intuition, tha se për sistemet autonome si makinat, dronët apo automjetet industriale, simulimet nuk mjaftojnë më. “Duhet ta gjesh në botën reale”, u shpreh ai, duke nënvizuar se AI po arrin kufijtë e asaj që mund të mësojë vetëm nga interneti apo të dhënat sintetike.
Diskutimi u fokusua edhe te kostot në rritje të infrastrukturës së AI. Ndërtimi i qendrave të të dhënave, sigurimi i energjisë elektrike dhe furnizimi me çipa të avancuar po bëhen gjithnjë e më të kushtueshme, ndërsa kërkesa për modele më të fuqishme po rritet me ritme shumë më të shpejta sesa kapacitetet aktuale të industrisë. Sipas pjesëmarrësve, kjo po krijon një hendek mes pritshmërive të tregut dhe realitetit teknik.
Një tjetër shqetësim lidhet me faktin se arkitektura aktuale e AI mund të mos jetë e qëndrueshme afatgjatë. Disa prej drejtuesve sugjeruan se mënyra se si po ndërtohen sot modelet e mëdha gjuhësore mund të mos jetë rruga përfundimtare drejt inteligjencës artificiale të avancuar. Kjo vjen në një moment kur kompanitë teknologjike po investojnë qindra miliarda dollarë në qendra të të dhënave, energji dhe infrastrukturë AI, ndërsa presioni për të gjeneruar fitime reale po rritet.
Paneli reflektoi gjithashtu një ndryshim të tonit në industrinë e AI. Pas dy vitesh optimizëm ekstrem dhe garë agresive investimesh, drejtuesit e sektorit po flasin gjithnjë e më hapur për kufijtë teknikë, kostot dhe vështirësitë që po dalin në sipërfaqe, duke sinjalizuar se faza e ardhshme e AI mund të jetë më pak për “rritje me çdo kusht” dhe më shumë për qëndrueshmëri ekonomike dhe teknologjike.. / TECHCRUNCH
Postimi ” Kriza e fshehur e AI, mungojnë të dhënat reale, energjia dhe infrastruktura ” eshte marre nga Revista Monitor.
