Tregu i pasurive të paluajtshme në Maqedoninë e Veriut po tkurret nën peshën e rritjes së çmimeve. Të dhënat zyrtare për tremujorin e tretë të këtij viti tregojnë se numri i banesave të shitura ka rënë me 14% krahasuar me tremujorin e dytë, ndërkohë që numri i banesave të dhëna me qira është rritur me 45%.
Më pak transaksione dhe vlerë më e ulët
Raporti për Regjistrin e Çmimeve dhe Qirave evidenton se nga korriku deri në shtator janë regjistruar gjithsej 7.679 transaksione, me një rënie prej 8,2%. Tkurrja më e theksuar u shënua te shitblerjet, numri i të cilave u zvogëlua me 12,1%.
Edhe vlera totale e transaksioneve pësoi rënie, duke zbritur në 339 milionë euro në tremujorin e tretë, ose 3,6% më pak se në tremujorin paraardhës. Pjesa dërrmuese e kësaj shume, 337,8 milionë euro, i përket shitblerjes së pasurive të paluajtshme, ndërsa vlera e regjistruar e qirave arriti në 1,1 milion euro.
Vlera financiare e shitblerjeve u ul me 3,6%, ndërsa ajo e qirave ra me 10,2%, edhe pse numri i banesave të dhëna me qira u rrit ndjeshëm.
Çmimet rekord në Karposh
Çmimi më i lartë për metër katror arriti në 3.121 euro dhe u regjistrua në komunën Karposh. Në një rast, blerësi pagoi 128.000 euro për një banesë me sipërfaqe 41 metra katrorë. Ndërkohë, banesa më e shtrenjtë e shitur nga një investitor kishte sipërfaqe 63 metra katrorë dhe çmimi i saj shkoi rreth 200.000 euro.
Vlerësimi i Kadastrës
Agjencia për Kadastër të Patundshmërive vlerëson se tregu po shfaq lëvizje të ndryshme në dy segmentet e tij. Nga njëra anë, aktiviteti në shitblerje është zvogëluar, ndërsa nga ana tjetër vërehet një rritje e moderuar e numrit të kontratave të qirasë, e shoqëruar njëkohësisht me ulje të shumës së përgjithshme mujore të qirave.
