“Mashtrimi”, me gjithë format apo mënyrat i ka rrënjët aq të thella aq sa vetë njerëzimi. Ndër vite, duke iu përshtatur ndryshimeve sociale, ekonomike e politike, ai ka pësuar “mutacione”, por efekti për të infektuar individë në veçanti e shoqëri në përgjithësi ka mbetur i njëjtë.
Pikërisht, për të këshilluar e ndërgjegjësuar njerëzit që të mos joshen nga forma e bukur, akademiku dhe studiuesi Adrian Civici vjen me botimin “Mashtruesit Financiarë, Nga Ponzi te Madoff”.
Synimi kryesor i tij është rritja e edukimit dhe njohurive financiare e monetare, e ndërgjegjësimit të gjithkujt kundrejt ofertave joshëse e përfshirjes në skema të ndryshme mashtruese financiare.
Referuar ngjarjeve që zhvillohen në libër, e njëherazi historisë në rrafshin më të gjerë, një viktimë mashtrohet kryesisht nga mungesa e njohurive.
