Reshjet e dendura të shiut kanë qenë mbi projeksionet më ekstreme të institucioneve, duke vështirësuar edhe menaxhimin e kaskadës.
KESH është akuzuar nga Partia Demokratike se ka vendosur të importojë energji, duke e ditur se do të kishte prurje dhe duke shpërdoruar miliona euro. Opozita i referohet tenderit për periudhën 14-20 Nëntor, ku u shpenzuan 9.7 milionë euro.
Por për kryeministrin Rama, ky është një dezinformim.
E vërteta është se KESH ka vendosur të importojë energji elektrike sipas procedurës së datës 11 Nëntor, sepse nga të gjitha parashikimet e motit, situata e reshjeve pritej të intensifikohej vetëm në mesditën e datës 20 Nëntor dhe nëse nuk do të ishte importuar, rezerva energjetike do të ishte në minimalen historike, duke rrezikuar vetë furnizimin normal me energji.
![](https://wallstreet.al/ngarkuara/Menaxhimi-i-reshjeve-dhe-energjise-KESH-bleu-per-te-mos.jpg)
Disa ditë përpara reshjeve intensive, KESH shpalli dy procedura për të optimizuar energjinë elektrike. E para duke tentuar një procedura shkëmbimi, që energjia e datave nga 19 Nëntor deri më 24 Nëntor, të shitej dhe t’i rikthehej kompanisë në qershor 2023. Kompania nuk publikoi rezultatet e kësaj thirrjeje.
![](https://wallstreet.al/ngarkuara/1669037292_531_Menaxhimi-i-reshjeve-dhe-energjise-KESH-bleu-per-te-mos.jpg)
Ndërsa procedura e dytë kishte të bënte me optimizimin, pra shitje për datat 19 deri më 22 Nëntor dhe blerje për datat 26 Nëntor deri më 4 Dhjetor 2022. Nga kjo kërkesë optimizimi, KESH arriti të shesë 16,200 megavatorë, për një shumë prej 3.3 milionë eurosh.
![](https://wallstreet.al/ngarkuara/1669037293_31_Menaxhimi-i-reshjeve-dhe-energjise-KESH-bleu-per-te-mos.jpg)
Së fundmi, mëngjesin e së hënës, KESH hapi një procedurë për shitjen e mbiprodhimit. Por arriti të shesë vetëm 8,040 megavatorë, për një total prej 662 mijë eurosh, për një çmime mesatar prej 82 eurosh për njësi, një skonto e ndjeshme krahasuar me nivelet e bursës.
Burimi: A2 CNN