Ministri i Financave, Punës dhe Transfereve, Hekuran Murati ka kërkuar që bizneset duhet t’ua rrisin pagat punëtorëve.
Sipas Muratit, bashkë me rritjen e çmimeve, shumica e bizneseve kanë rritur edhe fitimet.
“Bizneset t‘i rrisin pagat e punëtorëve. Çmimet janë rritur, por bashkë me çmimet, shumica e bizneseve kanë rritur edhe fitimet. Andaj është koha që fitimet e shtuara, bizneset t’i ndajnë me ata që ua mundësojnë të kenë fitim – pra punëtorët. Sidomos tani kur jeta është bërë më e vështirë si rezultat i çmimeve më të larta”, ka shkruar Murati në profilin e tij në Facebook.
Ai ka shtuar se Qeveria do ta mbështes me 50 për qind për tre muaj secilin biznes që rrit pagat e punëtorëve.
“Për ta bërë më të lehtë, qeveria do të mbështesë secilin biznes që rrit pagat e punëtorëve duke subvencionuar 50% të rritjes së pagës, për 3 muajt e parë, sipas kushteve dhe kritereve të aplikueshme. Secili biznes që ka rritur pagat e punëtorëve nga shtatori e këtej, dhe dëshiron të përfitojë nga mbështetja e qeverisë, mund të aplikojë në platformën EDI deri më 20 dhjetor”, përfundoi Murati.
Kosova, ka muaj apo edhe vite, që përballet me mungesë punëtorësh të profileve të ndryshme, nga kamerierët e rrobaqepësit deri te mjekët e infermierët.
Kjo, përkundër shkallës së papunësisë që arrin në mbi 17 për qind, sipas Agjencisë së Statistikave të Kosovës.
Paga minimale në Kosovë, nga viti 2011, është 130 euro për personat nën moshën 35 vjeç dhe 170 euro për ata mbi 35 vjeç.
Paga mesatare bruto për vitin 2021, sipas ASK-së, ka qenë 484 euro. Sipas Sindikatës së Pavarur të Sektorit Privat, një tjetër arsye që ka çuar në krizë për punëtorë është emigrimi i qytetarëve.
Postimi ” Ministri i Financave u bën thirrje bizneseve të Kosovës që t’i rritin pagat ” eshte marre nga Revista Monitor.
