Prej gati një dekade, sektori i ndërtimit në vendin tonë është alternativë kryesore investimi, duke tërhequr gjithnjë e më shumë biznese të reja që përfshihen në këtë aktivitet.
Sektorët e lidhur me teknologjinë dhe infrastrukturën po shfaqin ritmet më të larta të rritjes të bizneseve, ndërkohë që sektorët tradicionalë si tregtia dhe industria janë stabilizuar ose po qëndrojnë në vendnumëro.
Të dhënat zyrtare të INSTAT treguan se në vitin 2025 numri i bizneseve në ndërtim arriti me 8335 me zgjerim vjetor prej 11.4% me rreth 856 biznese të reja të shtuara vitin e kaluar.
Sektori i informacionit dhe komunikimit kryeson sa i përket shpejtësisë së zgjerimit, me një rritje prej 14.0%, duke u shtuar me 757 biznese dhe duke arritur në gjithsej 6,165 në vitin 2025. Ky zgjerim tregon për një orientim të sipërmarrjes drejt digjitalizimit dhe shërbimeve teknologjike.
Pas tij, sektori i transportit dhe magazinimit ka shënuar një rritje mjaft pozitive prej 11.8%, duke shtuar 810 njësi.
Nga ana tjetër, tregtia vazhdon të mbajë peshën kryesore në ekonomi me një total prej 44,606 biznesesh në vitin 2025. Megjithatë, ky sektor ka shfaqur një ngadalësim të fortë, duke u rritur me vetëm 0.3% ose 144 njësi më shumë se një vit më parë.
Një ecuri e ngjashme është vërejtur edhe në sektorin e industrisë, i cili është zgjeruar me vetëm 0.5%, duke i shtuar tregut vetëm 48 njësi të reja.
Ndërkohë, sektorët e shërbimeve po tregojnë performancë pozitive. Akomodimi dhe shërbimi ushqimor, i nxitur edhe nga zhvillimet në turizëm, u rrit me 3.1%, duke arritur në 18,426 njësi ligjore në vitin 2025.
Ndërsa kategoria “Shërbime të tjera” ka shënuar rritjen më të madhe në vlerë absolute, me plot 2,568 njësi të reja ligjore (një zgjerim prej 6.6%), gjë që dëshmon për një diversifikim gradual të aktivitetit ekonomik drejt shërbimeve të ndryshme mbështetëse për bizneset dhe individët.
Struktura e bizneseve sipas aktivitetit ekonomik tregon se konsumi nëpërmjet tregtisë mbetet ende shtylla qendrore e aktivitetit ekonomik, por rritja pothuajse zero e këtij sektori sinjalizon se ky treg ka arritur në pikën e ngopjes, duke detyruar kapitalin të kërkojë hapësira të reja.
Ndërtimi dhe sektori i transportit dhe i magazinimit po tërheqin kapitalet e lira, të nxitura nga zhvillimi i pasurive të paluajtshme dhe nevoja e shtuar logjistikë në një ekonomi që po shkon drejt tregtisë online dhe digjitalizimit.
Por qëndrimi në vendnumëro i sektorit të industrisë tregon se ekonomia po bëhet gjithnjë e më e varur nga sektorët e shërbimeve dhe investimet në llaç dhe tulla, ndërkohë që baza prodhuese vendase po humb terren, duke bërë që në afat të gjatë të cenojë qëndrueshmërinë ekonomike dhe bilancin tregtar të vendit./ B.Hoxha
Burimi: INSTAT
Postimi ” Ndërtimi dhe teknologjia udhëheqin rritjen e bizneseve, ngec industria ” eshte marre nga Revista Monitor.
