Në Shqipëri numërohen aktualisht mbi 41 mijë konsumatorë vetëprodhues të energjisë elektrike, me një kapacitet të instaluar prej rreth 320 megavatësh, sipas të dhënave të Operatorit të Sistemit të Shpërndarjes (OSSH). Shifra pasqyron zgjerimin e shpejtë të prodhimit të energjisë për nevoja vetjake, kryesisht përmes paneleve diellore.

Gjithnjë e më shumë familje, biznese dhe institucione po vendosin të investojnë në impiante diellore, duke kaluar nga roli i konsumatorit të thjeshtë në atë të prodhuesit të energjisë. Pjesa më e madhe e vetëprodhuesve i përket sektorit privat, por edhe institucionet publike përbëjnë një numër të konsiderueshëm.

Hovi pas lehtësimit të procedurave

Tendenca nisi të forcohej në vitet 2018-2019, kur procedurat për lidhjen e impianteve vetëprodhuese me rrjetin elektrik u thjeshtuan. Përqendrimi më i lartë i këtyre instalimeve vërehet në Tiranë dhe Durrës, ku zhvillimi urban dhe ekonomik ka shtyrë investimet në energjinë diellore.

“Duke nisur me vitin 2018-2019, ku nëpërmjet udhëzimit numër 3 u lehtësua lidhja e impianteve vetëprodhuese deri në 500 kilovat me rrjetin e shpërndarjes. Sot që flasim, aktualisht jemi te 41 mijë e 629 konsumatorë vetëprodhues, me një fuqi prej 320 megavatësh”, tha Xheni Kazaferi, përfaqësuese e OSSH.

Sfida për rrjetin e shpërndarjes

Rritja e numrit të prodhuesve sjell njëkohësisht presion mbi rrjetin elektrik, i cili duhet të përshtatet jo vetëm për furnizimin e konsumatorëve, por edhe për të përthithur energjinë që ata prodhojnë dhe e hedhin në rrjet.

Për këtë qëllim, OSSH parashikon investime në infrastrukturë, të shoqëruara me monitorim dhe analiza teknike për menaxhimin e flukseve të energjisë.

“Investimi është një instrument i rëndësishëm i kësaj strategjie, por nuk është i vetmi. Kjo do të thotë analiza teknike, monitorim i rrjetit dhe administrim i flukseve të energjisë”, theksoi Kazaferi.

Prodhimi i energjisë nga vetë konsumatorët pritet të vazhdojë të zgjerohet edhe në vitet në vijim, duke e bërë përshtatjen e rrjetit elektrik një nga sfidat kryesore për sistemin e shpërndarjes në vend.