Qeveria ka nxjerrë për konsultim publik një projektligj që ndryshon ligjin “Për qeverisjen elektronike”, me synimin për të hapur një fazë të re në digjitalizimin e administratës publike. Në qendër të ndryshimeve janë transparenca, thjeshtimi i procedurave dhe shërbime më të mira për qytetarët dhe bizneset, ndërsa risia kryesore është ngritja e platformës kombëtare “Pasqyra Albania”.

Një pikë e vetme kontakti me institucionet

Platforma do të funksionojë si pikë e vetme kontakti për transparencën dhe komunikimin me qytetarët. Nëpërmjet saj, qytetarët dhe subjektet private do të mund të ndjekin në kohë reale se si po ecin kërkesat dhe ankesat që kanë depozituar pranë institucioneve publike, si dhe të mësojnë afatet ligjore brenda të cilave ato duhet të trajtohen.

“Pasqyra Albania” do të japë gjithashtu akses në informacionin dhe dokumentacionin publik dhe do të lejojë monitorimin e projekteve publike, duke përfshirë institucionet përgjegjëse, financimin, afatet dhe fazat e zbatimit.

Sipas projektligjit, platforma do të ndërveprojë me sistemet ekzistuese qeveritare dhe institucionale, pa ngritur regjistra të rinj dhe pa dyfishuar të dhënat. Trajtimi i kërkesave dhe ankesave mbetet në përgjegjësi të institucioneve kompetente, ndërsa zhvillimi dhe mirëmbajtja e platformës i ngarkohen AKSHI-t.

Privatët, akses me pagesë në të dhënat shtetërore

Ndryshimi i dytë i rëndësishëm lidhet me zgjerimin e aksesit të subjekteve private në bazat e të dhënave shtetërore. Projektligji parashikon që personat fizikë dhe juridikë privatë të mund të verifikojnë drejtpërdrejt të dhënat parësore në burimet shtetërore, sipas kushteve që përcakton legjislacioni përkatës.

Relacioni i projektligjit thekson se kjo ndërhyrje synon uljen e burokracisë, shkurtimin e kohës së shërbimit dhe reduktimin e kostove për qytetarët dhe bizneset. Njëkohësisht, pritet të forcohen mekanizmat kundër mashtrimit dhe përdorimit të dokumenteve të falsifikuara.

Aksesi për subjektet private do të jetë me pagesë dhe të ardhurat nga tarifat do të kalojnë në buxhetin e shtetit. Kushtet e aksesit do të përfshijnë:

  • garanci për mbrojtjen e të dhënave personale;
  • akses vetëm për lexim;
  • marrjen e pëlqimit të subjektit për të dhënat personale;
  • regjistrimin e çdo aksesi.