Agjencia Kombëtare e Shoqërisë së Informacionit (AKSHI) ka parashikuar 150 milionë lekë për një projekt që synon zbulimin dhe detektimin e hershëm të sëmundjeve me anë të inteligjencës artificiale, me afat zbatimi deri në vitin 2029. Nisma bën pjesë në listën e projekteve për vitin 2027, të financuara nga investimet e brendshme publike.
Drejtimet kryesore ku do të përqendrohen investimet e reja të agjencisë janë përdorimi i inteligjencës artificiale në shëndetësi, digjitalizimi i pushtetit vendor dhe modernizimi i sistemeve të drejtësisë. Lista përfshin disa nisma me vlerë qindra milionë lekë, që shtrihen në disa vite, madje edhe përtej vitit 2029.
IA në shërbim të shëndetësisë
Projekti për shëndetësinë ka si qëllim futjen e teknologjisë së inteligjencës artificiale në proceset e identifikimit të hershëm të sëmundjeve. Kjo do të krijonte mundësi që ndërhyrjet në sistemin shëndetësor të bëhen më shpejt.
Pushteti vendor merr fondin më të madh
Investimi me vlerën më të lartë në këtë listë është digjitalizimi i pushtetit vendor, për të cilin janë parashikuar 4 miliardë e 75 milionë lekë. Zbatimi i tij do të zgjasë disa vite, ndërsa financimi do të vazhdojë edhe pas vitit 2029.
Drejtësia dhe të rinjtë
Një tjetër ndërhyrje ka të bëjë me sistemin e kartelave të të dënuarve. Për përmirësimin e tij janë planifikuar 70 milionë lekë, me një projekt që do të vijojë deri në vitin 2029. Synimi është që administrimi dhe përpunimi i të dhënave të bëhet më mirë përmes sistemeve digjitale.
Në listë është përfshirë gjithashtu Regjistri Kombëtar i Rinisë, me një fond të parashikuar prej 60 milionë e 25 mijë lekësh dhe afat zbatimi deri në vitin 2028. Projekti synon ngritjen e një sistemi të posaçëm për regjistrimin dhe administrimin e të dhënave që lidhen me të rinjtë.
