Njësitë e vetëqeverisjes vendore do të kenë në dispozicion gjatë vitit 2027 një buxhet të parashikuar prej 114.6 miliardë lekësh, që përkthehet në një rritje prej 2.4% krahasuar me nivelin që pritet të arrihet në vitin 2026. Sipas projektbuxhetit 2027, shteti do të vazhdojë të rrisë mbështetjen financiare për bashkitë dhe qarqet, kryesisht përmes transfertave ndërqeveritare.

Transferta e pakushtëzuar rritet me 1.4 miliardë lekë

Për vitin e ardhshëm, transferta e pakushtëzuar parashikohet në vlerën 29.3 miliardë lekë, ose rreth 321 milionë euro. Kjo shumë është 1.4 miliardë lekë më e lartë se në vitin 2026 dhe synon të sigurojë më shumë fonde për ushtrimin e funksioneve vendore, si dhe të forcojë autonominë financiare të pushtetit lokal.

Në nivel individual, transferta e pakushtëzuar për çdo bashki do të rritet mesatarisht me rreth 5%, ndërsa për qarqet rritja mesatare vlerësohet rreth 4% krahasuar me një vit më parë.

Draftbuxheti parashikon gjithashtu që funksionet e transferuara te pushteti vendor të vijojnë të financohen nëpërmjet transfertës së pakushtëzuar sektoriale, e cila arrin në 15.4 miliardë lekë, me një rritje prej 2% në raport me vitin paraardhës.

Fond i veçantë për pagat

Një element i rëndësishëm i buxhetit vendor është fondi shtesë prej 4.5 miliardë lekësh, ose 49 milionë euro, i destinuar për rritjen e pagave. Ky fond do të mbulojë efektin financiar shtesë që vjen nga rritja e kufirit minimal të nivelit të pagave në njësitë e vetëqeverisjes vendore, si dhe nga rritja e pagës minimale.

Granti i performancës dhe shpenzimet operative

Bashkitë do të vazhdojnë të përfitojnë nga granti i performancës, në shumën 200 milionë lekë. Qëllimi i tij është t'i nxisë ato të përmirësojnë qeverisjen, menaxhimin e financave publike vendore dhe transparencën.

Për shpenzimet operative të funksioneve të transferuara, projektbuxheti parashikon një fond shtesë prej 200 milionë lekësh, ose rreth 1.4% më shumë se një vit më parë. Kjo shumë ndahet si më poshtë:

  • 100 milionë lekë për arsimin parashkollor (kopshtet);
  • 100 milionë lekë për mbrojtjen nga zjarri dhe shpëtimin, nga të cilat përfitojnë 17 bashki me një shtesë prej 83 punonjësish.

Sipas dokumentit, Buxheti Vendor 2027 ka për synim rritjen e efikasitetit në përdorimin e fondeve publike, forcimin e autonomisë fiskale të bashkive dhe mbështetjen e zhvillimit të qëndrueshëm ekonomik, social dhe territorial në të gjithë vendin.