Qeveria po përgatitet të vërë së shpejti në dispozicion të publikut “Pasqyrë Albania”, një platformë e vetme digjitale përmes së cilës qytetarët do të mund të marrin informacion për investimet publike, të ndjekin aplikimet dhe ankesat e tyre, si dhe të japin kontribut në vendimmarrjen publike.

Funksionalitetet e platformës u prezantuan gjatë një takimi të kryeministrit Edi Rama me ekspertët e AKSHI-t, të cilët janë të angazhuar në konfigurimin e saj. Sipas kryeministrit, nisma lindi nga reflektimi mbi protestat e fillimit të qershorit dhe ka si qëllim të ndryshojë marrëdhënien ndërmjet qytetarëve dhe administratës publike.

Katër shtyllat e platformës

Platforma ndërtohet mbi katër shtylla kryesore. Rubrika “Shih” do t’u japë qytetarëve mundësinë të kontrollojnë investimet publike në zonën ku banojnë, ecurinë e projekteve dhe nismat prioritare të qeverisë. Përmes rubrikës “Kupto”, ata do të njihen me vendimet e bashkive dhe të këshillave bashkiakë, edhe me ndihmën e një asistenti virtual që përmbledh vendimmarrjen vendore.

Një ndër funksionet kryesore ka të bëjë me ndjekjen e aplikimeve dhe ankesave. Duke u identifikuar me llogarinë në e-Albania, qytetarët do të shohin në cilën fazë ndodhet kërkesa e tyre dhe cili institucion po e trajton. Kur tejkalohen afatet ligjore për përgjigje, qytetari do të njoftohet me SMS dhe do të mund të paraqesë drejtpërdrejt një ankesë, e cila do të marrë një kod të veçantë dhe do të jetë e gjurmueshme gjatë gjithë procesit të trajtimit.

Shtylla e katërt, “Bashkëvendos”, do të funksionojë si hapësirë për konsultim publik, ku qytetarët mund të shprehin mendimet e tyre për projektakte dhe nisma të ndryshme.

“Flamingo Mirror” dhe aksesi

Platforma do të përfshijë edhe “Flamingo Mirror”, një seksion i dedikuar projekteve me rëndësi të veçantë dhe çështjeve me interes të lartë publik, me synimin për të ofruar informacion transparent dhe për të luftuar dizinformimin.

“Pasqyrë Albania” do të jetë e aksesueshme si nga kompjuteri, ashtu edhe nga telefoni, përmes faqes web dhe si aplikacion për Android dhe iOS.