Qeveria ka hedhur për konsultim publik projektligjin e ri për akuakulturën, me synimin për të tërhequr më shumë investime në këtë sektor dhe për ta shtrirë aktivitetin edhe në ujërat e brendshme dhe në sipërfaqet tokësore. Dokumenti sjell rregulla të reja për kohëzgjatjen e kontratave, investimet, licencimin dhe mënyrën e përdorimit të sipërfaqeve ujore e tokësore.
Kontrata deri në 20 vjet
Ndër ndryshimet më të rëndësishme është kohëzgjatja e kontratave të akuakulturës, e cila sipas projektligjit mund të shkojë deri në 20 vjet, si për sipërfaqet ujore, ashtu edhe për ato tokësore. Qeveria dhe njësitë e vetëqeverisjes vendore do të kenë të drejtë të japin pronat me qira për ushtrimin e këtij aktiviteti.
Në kontrata do të përcaktohen afatet për nisjen dhe përfundimin e investimeve dhe të veprave të nevojshme. Këto duhet të realizohen brenda 3 viteve nga data e nënshkrimit.
Zonat e Përcaktuara për Akuakulturë
Projektligji rishikon edhe procedurat për përcaktimin dhe administrimin e Zonave të Përcaktuara për Akuakulturë (ZPA), të cilat shërbejnë për zhvillimin e akuakulturës detare dhe të infrastrukturës që lidhet me të. Hartimi dhe miratimi i tyre do të kryhen brenda planifikimit të hapësirës detare, në mënyrë që aktiviteti të harmonizohet me përdorimet e tjera të detit dhe të shmangen konfliktet ndërmjet tyre.
Ndryshe nga akuakultura detare, veprimtaritë në ujërat e brendshme dhe në sipërfaqet tokësore nuk do të varen nga miratimi i një ZPA-je.
Dispozitë e veçantë për akuaponinë
Dokumenti përfshin gjithashtu një dispozitë të posaçme për akuaponinë, sistemin që kombinon rritjen e organizmave ujorë me kultivimin e bimëve. Për këtë veprimtari do të përcaktohen kushtet e ushtrimit, procedurat për përfitimin e së drejtës, kërkesat për licencim, si dhe detyrimi për t’u pajisur me lejet dhe autorizimet përkatëse.
Konkurrim publik për të drejtën e ushtrimit
E drejta për të ushtruar akuakulturë do të jepet nëpërmjet procedurave të konkurrimit publik, për zonat detare të miratuara si ZPA, për ujërat e brendshme dhe për sipërfaqet tokësore shtetërore ose vendore. Këto procedura do të organizohen nga ministria përgjegjëse dhe do të jenë të hapura për personat fizikë dhe juridikë që përmbushin kriteret ligjore.
Aktiviteti duhet të kryhet brenda zonës ose sipërfaqes së përcaktuar në kontratë, në përputhje me llojet dhe sasitë e miratuara të organizmave ujorë. Çdo ndryshim i specieve të kultivuara ose rritje e kapacitetit prodhues do të kërkojë ndryshimin e kontratës, pas një vlerësimi teknik që merr parasysh kapacitetin mbajtës të zonës, kushtet mjedisore dhe kërkesat ligjore. Përjashtim nga ky rregull bëjnë rastet që i nënshtrohen një regjimi të posaçëm ligjor.
