Njësia evropiane e Amazon dhe dy menaxherë të lartë të kompanisë rrezikojnë të dalin para gjykatës në Itali, pasi prokurorët e Milanos i njoftuan se po shqyrtohet ndjekja penale për shitjen e mallrave kineze pa u paguar si duhet TVSH-ja e importit dhe detyrimet doganore.
Njoftimi për përfundimin e hetimit, një hap procedural që zakonisht vjen përpara kërkesës për gjykim, iu dorëzua si shoqërisë me seli në Luksemburg, ashtu edhe dy menaxherëve në fjalë.
Mbi 1.5 milion produkte nën hetim
Sipas akuzës, më shumë se 1.5 milion produkte me origjinë jashtë Bashkimit Evropian janë shitur në Itali përmes tregut online dhe rrjetit logjistik të Amazon, pa u shlyer TVSH-ja e importit dhe taksat doganore përkatëse.
Deri tani, prokurorët e kanë vlerësuar TVSH-në e papaguar të importit në mbi 3.52 milionë euro. Megjithatë, autoritetet doganore vazhdojnë ende llogaritjen e shumës totale të detyrimeve që dyshohet se janë shmangur, çka do të thotë se pretendimi i përgjithshëm mund të rritet pasi të mbyllet ky vlerësim.
Reagimi i Amazon
Kompania deklaroi se është "e përkushtuar të zbatonte të gjitha ligjet dhe rregulloret në fuqi në çdo vend ku operon dhe kërkojmë që të gjithë shitësit në tregun tonë të bëjnë të njëjtën gjë".
Amazon theksoi gjithashtu se është ndër investitorët më të mëdhenj të huaj në Itali, me më shumë se 19,000 punonjës të përhershëm, duke shtuar se "mjediset rregullatore të paparashikueshme, penalitetet joproporcionale dhe procedurat e zgjatura ligjore po ndikojnë gjithnjë e më shumë në atraktivitetin e Italisë si një destinacion investimi".
Hetimi nisi në nëntor
Ky është zhvillimi më i ri i një hetimi që filloi në nëntor të vitit të kaluar, kur policia kontrolloi selinë italiane të Amazon në Milano dhe një qendër logjistike afër Bergamos, në kuadër të verifikimeve për mashtrime të dyshuara doganore dhe tatimore lidhur me importet nga Kina.
