Jugu i Italisë po përballet me ndërprerje serioze të furnizimeve pas protestave të shoferëve të kamionëve, të shkaktuara nga shtrenjtimi i naftës dhe rritja e kostove të transportit. Bllokadat kanë lënë raftet e supermarketeve bosh dhe kanë shkaktuar mungesë karburanti në dy aeroporte, ndërsa qeveria italiane ka paralajmëruar ndëshkime penale, deri në burgim, për ata që bllokojnë rrugët.

Ndërhyrja e policisë

Policia po vepron për të rikthyer qarkullimin normal. Sipas të dhënave të qeverisë, janë identifikuar 1.339 persona, 71 prej tyre janë referuar pranë autoriteteve dhe janë vendosur 242 gjoba administrative. Ministria e Brendshme ka urdhëruar shoqërimin e kamionëve nga policia për të siguruar lëvizjen e mallrave, me 500 mjete të shoqëruara vetëm në rajonin e Kampanjës.

Mbi një miliard euro për transportin

Për të zbutur krizën, qeveria po shqyrton një mekanizëm fleksibël për vendosjen e kufijve në çmimet e benzinës dhe naftës. Ministri i Industrisë, Adolfo Urso, ka bërë të ditur një paketë mbështetëse prej mbi një miliard eurosh për sektorin e transportit. Prej tyre, 434,8 milionë euro janë parashikuar për kompensimin e kostove më të larta të naftës, ndërsa rreth 590 milionë euro do të përdoren për modernizimin e flotave të automjeteve.

Ushqime të bllokuara dhe shërbime të prekura

Bllokadat kanë penguar dërgesat e ushqimeve drejt dyqaneve dhe qendrave të shpërndarjes, duke lënë produkte të freskëta, si frutat dhe qumështi, të ngecura në pikat e prodhimit. Kryetarët e bashkive të Napolit dhe Barit i kanë kërkuar qeverisë ndërhyrje urgjente, duke paralajmëruar se situata rrezikon të përkeqësohet. Përveç furnizimit me ushqime, problemet kanë prekur edhe grumbullimin e mbetjeve dhe transportin publik.

Kriza shtrihet në aviacion dhe autostrada

Aeroportet e Krotones dhe Rexho Kalabrias kanë njoftuar mungesë karburanti për avionët, ndaj kompanive ajrore u është rekomanduar të furnizohen në aeroporte të tjera. Në të njëjtën kohë, bllokadat kanë sjellë trafik të rënduar dhe radhë kilometrike në disa segmente të autostradave A1 dhe A30.

Shoqatat kryesore të transportuesve kanë kërkuar t’u jepet fund bllokadave, duke argumentuar se protestat po dëmtojnë pikërisht sektorin që pretendojnë të mbrojnë. Edhe pse qeveria ka vënë në dispozicion fondet dhe ka nisur pagesat e ndihmës, protestat vazhdojnë, ndërsa autoritetet janë nën presion për të ulur kostot e karburantit dhe për të garantuar furnizimin normal të vendit.