Qeveria ka propozuar që tatimi mbi vlerën e shtuar për shërbimet e akomodimit të rritet nga 6% në 10%, duke i dhënë fund një regjimi të favorshëm që ka zgjatur gati një dekadë. Masa vjen në një moment të vështirë për sektorin e turizmit, i cili tashmë po përballet me zhvlerësimin e vazhdueshëm të euros kundrejt lekut dhe me shtrenjtimin e kostove të operimit.
Goditje e dyfishtë për sektorin
Operatorët e turizmit paralajmërojnë se kombinimi i këtyre dy faktorëve, kursi i këmbimit dhe rritja e taksës, përbën një goditje të dyfishtë që mund të dëmtojë konkurrueshmërinë e Shqipërisë si destinacion. Sipas tyre, vendi ka arritur deri tani të tërheqë vizitorë kryesisht falë çmimeve të ulëta, avantazh që rrezikon të zbehet nëse kostot vijojnë të rriten.
Shqetësimi i biznesit lidhet me faktin se rritja e TVSH-së do të reflektohet ose në çmimet për turistët, ose në marzhet tashmë të ngushta të strukturave akomoduese, në një kohë kur të ardhurat në euro përkthehen në më pak lekë.
