Apartamentet që jepen me qira ditore do të duhet të regjistrohen detyrimisht, ndërsa hotelet dhe strukturat e tjera akomoduese do të pajisen me certifikim të vlefshëm për 8 vjet. Këto janë ndër risitë kryesore të projektligjit të ri “Për turizmin”, që synon të zëvendësojë ligjin në fuqi të vitit 2015.
Kod unik për qiratë afatshkurtra
Sipas draftit, njësitë akomoduese për qëndrime afatshkurtra, si ato që ofrohen në platforma të tipit Airbnb, do të regjistrohen përmes portalit e-Albania dhe do të marrin një kod unik regjistrimi. Qëllimi është formalizimi dhe monitorimi i këtij aktiviteti.
Klasifikimi dhe kontrollet
Certifikata e klasifikimit për hotelet dhe strukturat e tjera akomoduese do të ketë vlefshmëri 8-vjeçare, me mundësi rinovimi. Ministria do të ketë të drejtë të kryejë kontrolle periodike për të verifikuar respektimin e standardeve.
Plazhet dhe mosmarrëveshjet
Projektligji parashikon ndryshime edhe në administrimin e plazheve, në sigurinë dhe higjienën e stacioneve të plazhit, si dhe në detyrimet e subjekteve që ofrojnë këto shërbime. Një risi tjetër është ngritja e Zyrës për Zgjidhjen Alternative të Mosmarrëveshjeve mes turistëve dhe operatorëve turistikë.
Për digjitalizimin e sektorit, në projektbuxhetin e vitit 2027 është propozuar një fond prej 300 milionë lekësh për krijimin e Sistemit të të Dhënave në Turizëm.
