Rreth 3 miliardë lekë për ndërtimin dhe rikonstruksionin e spitaleve në vitin 2027

Për vitin 2027 janë parashikuar rreth 3 miliardë lekë për ndërtimin dhe rikonstruksionin e ambienteve spitalore në vend. Kjo shumë mbulon punimet, projektimin dhe mbikëqyrjen, ndërsa blerja e pajisjeve mjekësore financohet nga zëra të tjerë buxhetorë. Të gjitha punimet garantohen me financim të brendshëm.

Korça merr fondin më të madh

Investimi më i madh për punime vitin e ardhshëm i takon godinës multifunksionale të Spitalit Rajonal të Korçës, me rreth 419 milionë lekë. Kostoja totale e ndërtimit të saj llogaritet në 1,4 miliardë lekë, me financim të planifikuar deri në vitin 2029.

Spitali Universitar i Traumës përfiton 390 milionë lekë për rikonstruksionin e godinave. Ky projekt mbështetet nga buxheti i Ministrisë së Mbrojtjes dhe zgjat deri në vitin 2032. Në QSUT vijojnë ndërhyrjet, me rreth 272 milionë lekë të parashikuara për rikonstruksionin e godinës së djegie-plastikës, ndërsa për maternitetin e Shkodrës fondi i punimeve arrin 260 milionë lekë.

Spitali i ri në Shënkoll të Lezhës

Ndër projektet e reja është ndërtimi i një spitali në Shënkoll të Lezhës, i destinuar për personat me mjekim të detyruar me vendim gjykate. Vlera e përgjithshme e investimit është rreth 1,2 miliardë lekë, nga të cilat 250 milionë lekë parashikohen për 2027, përmes Drejtorisë së Përgjithshme të Burgjeve.

Godinat qendrore të spitaleve të Pogradecit dhe Lushnjës do të rikonstruktohen me përkatësisht rreth 244 dhe 233 milionë lekë. Fonde për punime janë planifikuar edhe për spitalet e Matit, Dibrës dhe Gjirokastrës, për urgjencën e Durrësit dhe maternitetin e Fierit. Lista përfshin gjithashtu godinat e reja të spitalit psikiatrik të Elbasanit dhe ndërhyrje në Maternitetin nr. 1 në Tiranë.

Projekte pa fonde ndërtimi për vitin e ardhshëm

Jo të gjitha projektet e listuara kanë fonde për ndërtim në 2027. Për spitalin e ri rajonal të Tiranës, vitin e ardhshëm financohet vetëm projekt-ideja, ndërsa fondet për ndërtimin shfaqen nga viti 2029. Godina e re e spitalit “Shefqet Ndroqi” pritet të nisë të financohet në 2028, kurse materniteti i ri i Pogradecit në 2029.