Lidhja hekurudhore mes qytetit të Vlorës dhe aeroportit pritet të kushtojë 1,65 miliardë lekë. Shifra figuron në tabelën e investimeve publike me financim të brendshëm, që shoqëron projektbuxhetin e vitit 2027, ndërsa fondet e para janë planifikuar të akordohen vetëm në vitin 2029.
Projekti, i regjistruar me emërtimin “Ndërtimi i linjës hekurudhore Vlorë–VIA”, është futur në listë si investim i ri. Për dy vitet e ardhshme, 2027 dhe 2028, nuk është parashikuar asnjë fond. Në vitin 2029 pritet të alokohen rreth 520,2 milionë lekë, ndërsa pjesa e mbetur, prej 1,13 miliardë lekësh, do të paguhet pas atij viti.
Pjesë e një projekti më të gjerë
Linja drejt aeroportit bën pjesë në një nismë më të madhe, e cila përfshin edhe rehabilitimin e hekurudhës ekzistuese Rrogozhinë–Vlorë. Gjithsesi, zëri buxhetor prej 1,65 miliardë lekësh lidhet vetëm me ndërtimin e segmentit Vlorë–Aeroport.
Në prill të vitit 2025, Hekurudha Shqiptare shpalli fituese kompaninë austriake ILF Consulting Engineers Austria për studimin dhe hartimin e projektidesë së rehabilitimit të linjës Rrogozhinë–Vlorë dhe të lidhjes së re me aeroportin. Oferta fituese për këtë shërbim ishte 78,81 milionë lekë.
Në shkurt të vitit 2026, përfaqësues të Hekurudhës Shqiptare bënë të ditur se kontrata për projektin paraprak përfundonte në qershor të këtij viti. Sipas tyre, projekti do të përcaktonte gjurmën e lidhjes me aeroportin dhe zgjidhjen inxhinierike paraprake, mbi bazën e të cilave do të hapej gara ndërkombëtare për ndërtimin.
Linjë elektrike deri në 120 km/orë
Dokumentet e procedurës së projektimit parashikonin një hekurudhë elektrike, me shpejtësi deri në 120 km/orë. Qëllimi i projektit është ndërthurja e transportit hekurudhor me atë ajror dhe lehtësimi i aksesit të udhëtarëve në aeroportin e Vlorës.
