Ministri i Infrastrukturës dhe Energjisë, Enea Karakaçi, ka konfirmuar se ministria ka zgjidhur kontratën koncesionare të Aeroportit Ndërkombëtar të Vlorës, ndërsa institucionet janë duke kryer vlerësimet ligjore për të përcaktuar se si do të vazhdojë projekti dhe kur mund të fillojë operimi. Ministri nuk dha asnjë afat për nisjen e fluturimeve.

Në një intervistë televizive, Karakaçi u ndal te mosmarrëveshjet mes koncesionarëve dhe te hapat që qeveria po ndërmerr për të dalë nga ngërçi. Sipas tij, objekti duhej të kishte qenë gati në fillim të vitit 2026.

“Aeroporti duhet të ishte funksional në shkurt të vitit 2026, në bazë të kontratës. Dhe kur them funksional, nuk them vetëm i ndërtuar, por edhe operacional, pra të kishte marrë të gjitha licencat dhe të ishte gati për të filluar fluturimet e para. Patjetër, kjo gjë nuk ndodhi”

Pse kontrata nuk u zgjidh më herët

Ministri shpjegoi se qeveria hezitoi fillimisht ta ndërpriste marrëveshjen, me synimin që projekti të përfundonte.

“Nuk e zgjidhëm këtë. Pse nuk e zgjidhëm? Pikërisht sepse ne donim që aeroporti të bëhej. Në fund të ditës, ajo është një infrastrukturë publike për të cilën Shqipëria kishte kontraktuar dhe e meritonte që ta kishte të zhvilluar”

Megjithatë, sipas Karakaçit, situata nuk u zgjidh dhe konflikti mes kompanive vazhdoi të bllokonte zhvillimin e projektit. Ai e përshkroi mosmarrëveshjen si një konflikt civil dhe kontraktor mes koncesionarëve, që në fund krijoi pasiguri për vijimin e punës.

Arbitrazhi i dha të drejtë ministrisë

Karakaçi tregoi se koncesionarët iu drejtuan arbitrazhit gjatë procesit të ndërprerjes së kontratës.

“Gjatë kohës së zgjidhjes së kontratës së koncesionit, koncesionarët paditën ministrinë në arbitrazh dhe madje kërkuan edhe marrjen e një mase të përkohshme që të ndalonin zgjidhjen e kontratës nga ministria. U trajtua kjo çështje nga arbitri përkatës dhe arbitri përkatës vlerësoi që ministria ishte në të drejtën e saj që të zgjidhte kontratën e koncesionit”

Hapat e mëtejshëm

Për sa i përket së ardhmes së aeroportit, ministri theksoi se do të veprohet brenda kuadrit ligjor dhe kontraktual, por shmangu çdo parashikim kohor.

“Ministria do të marrë të gjitha masat që lejon kontrata e koncesionit, që ta bëjë operacional në përputhje me kushtet e kontratës. Patjetër, për këtë do të veprojmë sipas asaj që referon legjislacioni në fuqi dhe kontrata koncesionare. E kam të pamundur në këtë moment që t'ju them një afat, pasi ne jemi në fazë vlerësimi të kushteve të kontratës koncesionare dhe nuk dua të prononcoj një afat që mund të ishte i gabuar”