Ministri i Infrastrukturës dhe Energjisë, Enea Karakaçi, ka inspektuar nga afër ecurinë e punimeve në projektin e zgjerimit të aksit rrugor Elbasan-Qafë Thanë, duke vënë në dukje rëndësinë e veçantë që ka komponenti i mbrojtjes lumore, i cili po zbatohet për herë të parë në këtë segment.
Gjatë inspektimit, ai u ndal te ngjarja e regjistruar rreth gjashtë muaj më parë, kur një rrëshqitje masive dëmoi ecurinë e kantierit dhe qarkullimin e mjeteve. Ekspertët në terren arritën në përfundimin se një nga shkaqet kryesore ishte erozioni i thellë nga mungesa e masave mbrojtëse ndaj lumit.
Lidhur me shqetësimet e ngritura së fundmi në rrjetet sociale për navetimin apo dëmtimin e shtratit të lumit Shkumbin, ministri u shpreh se reagimet janë të kuptueshme por sqaroi se ndërhyrja përfshihet plotësisht në Projektin e Zbatimit dhe nuk përbën devijim të paligjshëm.
Në këtë fazë po realizohet sistemi mbrojtës i rrugës me pilota dhe mur betoni, ndërsa rruga do të ngrihet rreth 18 metra mbi nivelin aktual të lumit. Për të kryer këto punime në kushte të sigurta dhe të thata, është ndërtuar një argjinaturë provizore, e cila izolon përkohësisht zonën e punimeve nga prurjet e lumit.
Karakaçi theksoi se pamja aktuale nuk përfaqëson strukturën përfundimtare, por përbën një masë të përkohshme operative.
Me përfundimin e punimeve, argjinatura provizore do të hiqet dhe lumi do të marrë konfigurimin e përcaktuar në projekt. Ndaj, ajo që po ndërtohet sot nuk është shkatërrim i lumit, por pjesë e një ndërhyrjeje të planifikuar për mbrojtjen e rrugës dhe të vetë shtratit lumor, duke garantuar njëkohësisht sigurinë e infrastrukturës dhe funksionimin normal të Shkumbinit.
