Zgjerimi i superstradës Tiranë-Durrës dhe vijimi i bypass-it të Elbasanit me fonde të buxhetit të shtetit janë ndër prioritetet kryesore të investimeve rrugore për vitin 2027. Këtë e bëri të ditur ministri i Infrastrukturës dhe Energjisë, Enea Karakaçi, gjatë prezantimit të projektbuxhetit të sektorit në komisionin parlamentar për Burimet Natyrore, Infrastrukturën dhe Zhvillimin e Qëndrueshëm.

Projektet e reja me financim të brendshëm për 2027

Sipas ministrit, portofoli i projekteve të reja që do të financohen nga buxheti i shtetit në vitin 2027 përfshin:

  • aksin Elbasan-Qafë Thanë;
  • segmentin Ura e Grykshit-Peqin;
  • fazat e reja të zgjerimit të Tiranë-Durrës;
  • vijimin e aksit Kombinat-Ndroq-Plepa;
  • qendrën e monitorimit të trafikut;
  • ndërhyrjet për stabilizimin e aksit Librazhd-Qafë Thanë.

Karakaçi theksoi se ky portofol synon të rrisë lidhshmërinë mes qendrave ekonomike, të përmirësojë standardin dhe sigurinë në rrjetin rrugor kombëtar dhe të sigurojë vazhdimësi fizike mes investimeve ekzistuese dhe atyre të reja.

Plani për 2028 dhe fazat vijuese

Për vitin 2028, lista e projekteve të reja përfshin sërish vazhdimin e zgjerimit të superstradës Tiranë-Durrës, si dhe fazën e tretë të rrugëve lidhëse Tiranë-Elbasan me Korridorin 8, e njohur ndryshe si bypass-i i Elbasanit. Në plan janë gjithashtu hyrja verilindore e Tiranës, pra rruga lidhëse mes daljes nga kryeqyteti dhe Rrugës së Arbrit, si dhe ndërtimi i rrugës hyrëse veriore që anashkalon Kamzën, duke lidhur drejtpërdrejt autostradat e veriut me unazën e re të Tiranës. Në listë figurojnë edhe qendra e monitorimit të trafikut, studime dhe projektime të tjera.

Në fazën vijuese parashikohen rruga poshtë aksit të ri Berat-Skrapar dhe faza e 10-të e zgjerimit të Tiranë-Durrës.

Buxheti afatmesëm dhe bypass-i i Elbasanit

Duke iu referuar programit afatmesëm të transportit rrugor, ministri tha se ai buxheton plotësisht zgjerimin e superstradës Tiranë-Durrës deri në fazën e 10-të, që shtrihet deri te ura e Dajlanit në Durrës.

Për bypass-in e Elbasanit, Karakaçi kujtoi se qeveria ishte angazhuar fillimisht të siguronte financim të huaj. Megjithatë, për shkak të problemeve në trafik në pikën ku sot përfundon rruga Tiranë-Elbasan, shteti ka vendosur ta financojë projektin me fonde të brendshme buxhetore, sipas fazave të parashikuara në këtë projektbuxhet.

Investimet me financim të huaj

Në zërin e shpenzimeve kapitale me financim të huaj, ministri përmendi vazhdimin dhe përmbylljen e projektit për përmirësimin dhe rehabilitimin e urave, si dhe përfundimin e segmentit rrugor Qukës-Qafë Plloçë.

Ndër politikat e reja që pritet të nisin në vitin 2027 është ndërtimi i bypass-it të Tiranës. Pjesa e parë e tij, rreth 10 km, është financuar nga buxheti i shtetit dhe aktualisht është në zbatim.

„Bypass i Tiranës tashmë është financuar pjesa e parë, që është rreth 10 km nga buxheti i shtetit, e cila është duke u zhvilluar aktualisht dhe punimet kanë nisur mirë. Ndërkohë, vijimi i bypassit të Tiranës është angazhuar me Bankën Europiane për Rindërtim dhe Zhvillim, dhe pritet finalizimi i marrëveshjes së financimit pranë këtij viti”, tha Karakaçi.