Shtresa e mesme. Një kategorizim i popullsisë sipas gjendjes ekonomike, që rrjedhimisht përkthehet edhe në një ndarje sociale.
Përkufizimi është shumë i lirshëm, por konsensusi është se për të qenë pjesë e shtresës së mesme dikush duhet të ketë një banesë, një automjet, të heqë diçka mënjanë nga të ardhurat e tij dhe të përballojë 3-4 javë pushime në vit.
Me 50 mijë autovetura shtesë që regjistrohen çdo vit, kjo shtresë duket se po lulëzon në Shqipëri. Me mijëra familje që po bëjnë kapërcimin nga klasa punëtore.
Shtresa e mesme e rrezikuar, Angjeli: Domosdoshmëri mbrojtja e saj, të përshtaten politikat fiskale
Por kriza sot po e rrezikon klasën e mesme dhe progresin e bërë. Çmimet e shtrenjtuara të ushqimeve, karburantet e papërballueshme, metri katror i një apartamenti i dyfishuar në pak muaj, interesat e kredive që sa vijnë dhe rriten, si dhe kostoja e jetesës në tërësi po bëhen barriera.
Në këtë luftë të shtresës së mesme, qeveria po ndihmon vetëm te fatura e energjisë elektrike. Por jo te pagat. Nga rritja e pagës minimale, kjo pjesë e shoqërisë nuk preket, madje disa sot marrin 1600 lekë më pak çdo muaj prej kontributeve shtesë që derdhin për pensionin.
Ndërsa mjekët, avokatët, inxhinierët, arkitektët, kontabilistët e shumë profesionistë të lirë, shumë shpejt do të duhet të paguajnë ndjeshëm më shumë taksa se sot, me ligjin e ri që propozon Ministria e Financave.
Nismat e qeverisë, Shabani: Shtresa e mesme shihet si lopë për t’u mjelë, shërbimet nuk aksesohen
Një klasë e mesme më e dobët përkthehet në një rënie të konsumit. Jo një frikë, por një realitet i prekshëm sot. 9% më pak importe karburantesh, 3% më pak importe ushqimesh, një sektor shërbimesh që raporton më pak shitje, më pak udhëtime, dreka e darka.
Një tjetër tregues: fakti që edhe pse parashikimi i motit tregonte vetëm diell, makinat janë të mbuluara nga pluhuri. Në pritje, ashtu si qeveria, të shiut.
Burimi: A2 CNN
