Tregu shqiptar i sigurimeve po kalon një vit me rritje të zbehtë, që i afrohet stanjacionit. Të dhënat e Autoritetit të Mbikëqyrjes Financiare (AMF) tregojnë se në nëntë muajt e parë të vitit primet e shkruara bruto arritën vlerën e 20.6 miliardë lekëve, vetëm 1.9% më shumë se në të njëjtën periudhë të një viti më parë.

Kursi i këmbimit rëndon mbi primet

Një pjesë e ngadalësimit lidhet me ndikimin negativ të kursit të këmbimit. Gjatë këtij viti, Euro po zhvlerësohet ndaj Lekut me ritme më të shpejta, ndërsa rënia vjetore e kursit iu afrua nivelit të 5.5% në fund të shtatorit. Sipas AMF-së, rreth një e treta e kontratave të sigurimit janë të kuotuara në Euro, çka do të thotë se dobësimi i monedhës europiane e ul vlerën e primeve kur ato shprehen në lekë.

Jo-Jeta, segmenti më i madh, rritet me vetëm 1.5%

Ritmin më të ngadaltë e shfaq tregu i sigurimeve të Jo-Jetës, i cili zë edhe pjesën më të madhe të tregut. Primet e shkruara bruto në këtë segment arritën në 18.8 miliardë lekë, me një rritje vjetore prej vetëm 1.5%. Ky ngadalësim i ndjeshëm shpjegohet me performancën e dobët të produkteve të sigurimit vullnetar, si dhe me një rritje më të kufizuar të sigurimeve të detyrueshme motorike, të cilat mbeten shtylla kryesore e tregut në vend.

Zbatimi i sistemit bonus-malus ka sjellë një ulje të lehtë të primit mesatar për sigurimin e përgjegjësive motorike ndaj palëve të treta (TPL), produkti me peshën më të madhe në treg. Megjithatë, pesha e TPL-së është rritur më tej, duke arritur në 58.4% të tregut, pasi produktet e tjera kanë pasur një rritje edhe më të dobët.

Rënia më e theksuar u regjistrua te sigurimi nga zjarri dhe fatkeqësitë natyrore, produkti kryesor i sigurimit vullnetar, primet e të cilit për 9-mujorin 2026 ranë me 14.4% në krahasim me një vit më parë. Pesha e tij ndaj totalit të primeve të Jo-Jetës zbriti në 8.6%, nga 10.2% që ishte një vit më parë.

Nga ana tjetër, disa produkte vullnetare po rriten më shpejt se mesatarja e tregut. Veçanërisht dallohen sigurimet e sëmundjeve, me një rritje prej 12.2% krahasuar me vitin e kaluar.

Jeta mbetet e varur nga kreditë

Edhe tregu i sigurimeve të Jetës po ecën më ngadalë se një vit më parë. Primet e shkruara bruto për nëntë muajt u rritën me 6.8%. Ky segment vazhdon të mbështetet në masë dërrmuese te sigurimi i jetës së debitorit, një produkt i lidhur me kreditë e dhëna nga institucionet financiare. Pesha e këtij produkti në strukturën e primeve të tregut të Jetës u rrit në 84.1%, nga 82.6% që ishte një vit më parë, duke e thelluar më tej varësinë e segmentit nga aktiviteti kreditues.