Tregu shqiptar i sigurimeve e mbylli vitin 2025 me fitimin më të lartë në historinë e tij, duke u rikthyer në rritje pas një periudhe më të dobët. Të dhënat e Autoritetit të Mbikëqyrjes Financiare (AMF) tregojnë se fitimi i sektorit arriti në 3.13 miliardë lekë, rreth 32.4 milionë euro, në rritje me 38% krahasuar me vitin 2024. Ky rezultat u shoqërua edhe me shpërndarjen e dividendëve në nivelin më të lartë të regjistruar ndonjëherë.

Jo-Jeta, motori kryesor i fitimeve

Pjesën më të madhe të fitimit të vitit 2025 e solli segmenti i sigurimeve të Jo-Jetës, i cili mbetet edhe më i madhi në treg. Kompanitë që operojnë në këtë segment raportuan një fitim total prej 2.7 miliardë lekësh, ose 35% më shumë se një vit më parë.

Rezultatet pozitive të viteve të fundit u kanë dhënë mundësi një pjese të kompanive të shpërndajnë dividendë për aksionerët. Për vitin e kaluar, vlera e përgjithshme e dividendëve arriti në 1.67 miliardë lekë, një rekord historik, me një rritje prej 105% në raport me vitin 2024.

Sigal kryeson me 982 milionë lekë

Dividendin më të madh në treg e shpërndau kompania lider, Sigal Insurance Group, me një vlerë prej 982 milionë lekësh për vitin 2025. Kjo shumë është 180% më e lartë se dividendi i një viti më parë. Sigal kontrollohet tërësisht, në masën 100%, nga Drejtori i Përgjithshëm, Avni Ponari.

E dyta në renditje është Sigma Vienna Insurance Group, e cila shpërndau një dividend prej 248 milionë lekësh, ose 31% më shumë se në vitin paraardhës. Kompania zotërohet në masën 89% nga grupi austriak Vienna Insurance Group, ndërsa aksionet e tjera janë në duart e investitorëve shqiptarë.

Edhe Albsig, një tjetër kompani që ka paguar rregullisht dividend vitet e fundit, e rriti ndjeshëm shpërndarjen. Vitin e kaluar ajo shpërndau 200 milionë lekë, me një rritje prej 82% krahasuar me një vit më parë. Albsig është në pronësi të plotë të biznesmenit shqiptar Shefqet Kastrati.

Kompania e dytë e grupit vjenez në Shqipëri, Intersig Vienna Insurance Group, shpërndau dividend në vlerën e 137 milionë lekëve, 21% më shumë se në vitin 2024. Vienna Insurance Group zotëron 90% të aksioneve, ndërsa 10% e mbetur i përket biznesmenit shqiptar Gentian Sula.

Lista e kompanive të Jo-Jetës që shpërndanë dividend mbyllet me Atlantik, e cila pagoi 100 milionë lekë, duke e dyfishuar shumën në krahasim me vitin 2024. Atlantik zotërohet 100% nga biznesmeni Dritan Çelaj.

Sipas pasqyrave të audituara financiare, tre kompanitë e tjera të segmentit, Eurosig, INSIG dhe Ansig, nuk kanë shpërndarë dividendë gjatë viteve të fundit.

Përmbledhje e dividendëve në Jo-Jetë për 2025

  • Sigal Insurance Group: 982 milionë lekë (+180%)
  • Sigma Vienna Insurance Group: 248 milionë lekë (+31%)
  • Albsig: 200 milionë lekë (+82%)
  • Intersig Vienna Insurance Group: 137 milionë lekë (+21%)
  • Atlantik: 100 milionë lekë (dyfishim)

Sigurimet e Jetës: fitim në rritje, dividendë modestë

Në segmentin më të vogël të tregut, atë të sigurimeve të Jetës, fitimi për vitin 2025 arriti në 421 milionë lekë, me një rritje prej afërsisht 59% krahasuar me vitin 2024. Pavarësisht kësaj performance, dividendët në këtë segment mbetën në nivele modeste, rreth 147 milionë lekë gjithsej.

Vetëm dy nga katër kompanitë e tregut të Jetës shpërndanë dividend vitin e kaluar. Edhe këtu pjesa dërrmuese i përket grupit Sigal, përmes Sigal Life Insurance Group, e cila i shpërndau aksionerit të saj, Sigal Insurance Group, një dividend prej 147 milionë lekësh. Kjo vlerë është 20% më e ulët se dividendi i shpërndarë një vit më parë.

Kompania tjetër, Sicred, pagoi një dividend prej 6.5 milionë lekësh, pas një viti kur nuk kishte bërë asnjë shpërndarje. Sicred kontrollohet nga një grup aksionerësh individë shqiptarë.

Sektori financiar, tërheqës i investimeve të huaja

Sektori financiar vijon të jetë një nga degët kryesore që tërheqin investime të huaja në ekonominë shqiptare. Në veçanti, sektori bankar sjell vazhdimisht flukse të konsiderueshme investimesh, të nxitura si nga fitimet e larta vjetore, ashtu edhe nga rritja e kërkesave rregullatore për kapital gjatë viteve të fundit.

Vitin e kaluar, shërbimet financiare ishin sektori i dytë për nga pesha në totalin e Investimeve të Huaja Direkte, me investime në vlerën e 291 milionë eurove, ose rreth 18% të totalit. Investimet në këtë sektor u rritën me 1.4% krahasuar me një vit më parë.

Këtë vit kanë nisur aktivitetin edhe dy banka të reja me kapital të huaj, Banka Jet dhe dega e Bankës Ziraat në Shqipëri, duke e zgjeruar më tej praninë e investitorëve të huaj në sistem.

Të dhënat e Bankës së Shqipërisë tregojnë se Investimet e Huaja Direkte në sektorin financiar arritën vitin e kaluar në 238 milionë euro, në rritje me 51% krahasuar me vitin paraardhës. Sipas bankës qendrore, stoku total i Investimeve të Huaja Direkte në fund të tremujorit të parë 2026 arriti nivelin rekord prej 1.9 miliardë eurosh.

Stoku i investimeve të huaja në sektorin financiar është rritur me 6% krahasuar me një vit më parë dhe me 83% krahasuar me fillimin e vitit 2020. Kjo periudhë përkoi me pikun e goditjes pandemike në ekonomi, pas së cilës nisi një cikël i shpejtë rritjeje si për ekonominë, ashtu edhe për sektorin financiar në vend.