Pamjet dhe videot që qarkullojnë në rrjetet sociale po ndikojnë në mënyrën si përjetohen udhëtimet, duke e bërë një destinacion të duket i njohur edhe kur turisti shkel aty për herë të parë. Kjo del nga një sondazh i realizuar nga Hint App me 10,684 të rritur në disa rajone të botës.
Sipas rezultateve, 68% e udhëtarëve kanë provuar këtë ndjesi familjariteti. Po ashtu, 74% pranojnë se e studiojnë destinacionin aq në detaje, saqë pas mbërritjes u mbeten pak gjëra për t'i befasuar, ndërsa 64% i njohin paraprakisht monumentet dhe pikat panoramike falë rrjeteve sociale.
Si të ruhet ndjesia e zbulimit
Informacioni ndihmon në organizimin e udhëtimit, por hulumtimi i tepërt mund ta zbehë kënaqësinë e zbulimit. Prandaj sugjerohet që ekspozimi ndaj pamjeve para nisjes të kufizohet dhe të lihet hapësirë për të papriturat.
- Guidat e shtypura japin orientim pa zbuluar çdo hollësi.
- Bisedat me banorët vendas, stafin e hotelit dhe udhëtarë të tjerë mund të sjellin këshilla që nuk gjenden në ekran.
- Shëtitjet pa një program të ngjeshur krijojnë mundësi për të gjetur rastësisht një kafene, restorant apo muze.
Qëllimi është që informacioni të shërbejë si orientim, duke i lënë vend përvojës që pret udhëtarin në destinacion.
