Prej datës 15 Maj kanë nisur aplikimet për lidhjen e marrëveshjes së Paqes Fiskale dhe rideklarimit të pasqyrave financiare. Periudha e aplikimit mbyllet më 5 Qershor 2026.
Të gjithë tatimpaguesit që përmbushin kushtet, që nga të ardhurat bruto mbi 14 milion lekë në vit, nuk kanë detyrime të papaguara apo nuk kanë procedime penale, aplikimet do t’i bëjnë online në e-Filing ku është krijuar shërbimi “Aplikim për marrëveshjen e paqes fiskale”.
Për të dyja rastet si për lidhjen e paqes fiskale dhe rideklarimit të pasqyrave tatimpaguesit duhet të plotësojnë online formularin. Modeli i formularëve është publikuar nga Tatimet.
Drejtoria e Përgjithshme e Tatimeve ka sqaruar se përveç formularit, bizneset do të ngarkojnë online edhe dokumentacione, përfshirë Vërtetim për personin juridik, administratorët dhe pronarët përfitues, që nuk janë në proces procedimi penal për vepra penale në fushën tatimore (nga Prokuroria); Dëshmi penaliteti për personin juridik, administratorët dhe pronarët përfitues, që vërteton se nuk ka vendim të formës së prerë për mashtrim tatimor ose pastrim parash; Vërtetim që nuk është në proces ankimi administrativ (nga Drejtoria e Apelimit Tatimor); Vetëdeklarim që nuk realizon projekte koncesionare; Vetëdeklarim se nuk ka dijeni për procedime penale në fushën tatimore.
“Administrata Tatimore njofton të gjithë tatimpaguesit e regjistruar si person fizik ose entitet se aplikimi për lidhjen e Marrëveshjes së Paqes Fiskale për vitin tatimor 2026 mund të kryhet online në sistemin “e-filing”, nga data 15.05.2026 deri më 05.06.2026.
Të drejtën për të aplikuar e ka çdo tatimpagues që është subjekt i detyrimit të Tatimit mbi të Ardhurat e Korporatave dhe Tatimit mbi të Ardhurat Personale nga Biznesi dhe që plotëson njëkohësisht kushtet e mëposhtme:
- ushtron veprimtari ekonomike në Republikën e Shqipërisë;
- gjatë vitit tatimor paraardhës ka realizuar të ardhura bruto mbi 14 milionë lekë;
- nuk ka detyrime tatimore të papaguara ose të padeklaruara;
- nuk është në proces ankimi administrativ;
- nuk është subjekt i procedimeve penale për vepra në fushën tatimore;
- nuk është dënuar me vendim të formës së prerë për mashtrim tatimor, pastrim të produkteve të veprës penale ose fshehje të ardhurash;
- nuk është subjekt hetimi nga Administrata Tatimore;
- nuk realizon projekte koncesionare.
Tatimpaguesit që plotësojnë kushtet e mësipërme paraqesin kërkesën online në sistemin “e-filing”, në rubrikën “Çështjet e mia” – “Pyetje e përgjithshme”, duke vendosur titullin “Aplikim për Marrëveshjen e Paqes Fiskale” dhe duke ngarkuar dokumentacionin e mëposhtëm:
- Formularin e aplikimit të plotësuar (shtojca nr. 1);
- Vërtetim për personin juridik, administratorët dhe pronarët përfitues, që nuk janë në proces procedimi penal për vepra penale në fushën tatimore (nga Prokuroria);
- Dëshmi penaliteti për personin juridik, administratorët dhe pronarët përfitues, që vërteton se nuk ka vendim të formës së prerë për mashtrim tatimor ose pastrim parash;
- Vërtetim që nuk është në proces ankimi administrativ (nga Drejtoria e Apelimit Tatimor);
- Vetëdeklarim që nuk realizon projekte koncesionare;
- Vetëdeklarim se nuk ka dijeni për procedime penale në fushën tatimore.
Pas verifikimit të kushteve ligjore, sipas Ligjit nr. 84/2025 “Për marrëveshjen e paqes fiskale” dhe udhëzimit përkatës në zbatim të tij, vendimmarrja mbi aplikimin do t’i komunikohet tatimpaguesit në mënyrë elektronike në llogarinë e tij në sistemin “e-filing”, brenda 5 ditëve kalendarike, por jo më vonë se data 10.06.2026.
Brenda 5 ditëve nga komunikimi i vendimmarrjes, por jo më vonë se data 15.06.2026, dokumenti i nënshkruar nga përfaqësuesi ligjor i tatimpaguesit duhet të dorëzohet pranë Drejtorisë Rajonale Tatimore përkatëse, zyrtarisht ose përmes sistemit “e-filing”.
Tatimpaguesit që, në formularin e aplikimit, kanë deklaruar se do të kryejnë rideklarim të pasqyrave financiare për një ose disa vite tatimore, pas lidhjes së marrëveshjes dhe kryerjes së rideklarimeve/korrigjimeve përkatëse, duhet që brenda datës 30.06.2026:
- Të kryejnë pagesën e tatimit për çdo vit tatimor për të cilin është ndryshuar deklarata tatimore;
- Të dorëzojnë pranë Drejtorisë Rajonale Tatimore të juridiksionit formularin e aplikimit për rideklarimin e elementeve të veçanta të aktiveve, detyrimeve apo kapitaleve të veta të pasqyrave financiare vjetore, sipas shtojcës nr. 2 të udhëzimit përkatës;
- Të dorëzojnë pasqyrat financiare të rideklaruara;
- Të paraqesin çdo sqarim të nevojshëm mbi ndryshimet e reflektuara në zërat e pasqyrave financiare.
Administrata Tatimore fton të gjithë tatimpaguesit që plotësojnë kushtet ligjore dhe janë të interesuar të përfitojnë nga kjo marrëveshje, të aplikojnë brenda afatit 05.06.2026, pasi aplikimet e paraqitura pas këtij afati nuk do të pranohen”.
Postimi ” Tatimet publikojnë formularët për aplikimin e Paqes Fiskale dhe rideklarimit të pasqyrave ” eshte marre nga Revista Monitor.
