Drejtoria e Përgjithshme e Tatimeve ka rikujtuar bizneset mbi afatet kryesore për përfitimin nga “Paqja Fiskale” dhe ligji për faljen e detyrimeve tatimore, duke publikuar kalendarin zyrtar të procedurave dhe pagesave.
Sipas njoftimit të administratës tatimore, aplikimet për lidhjen e Marrëveshjes së Paqes Fiskale kanë nisur më 15 maj 2026 dhe do të mbyllen më 5 qershor 2026. Pas këtij afati, çdo aplikim i dorëzuar do të refuzohet.
Tatimet bëjnë me dije se subjektet që aplikojnë deri në datën 5 qershor duhet të ngarkojnë marrëveshjen e nënshkruar në sistemin “e-Filing” deri më 15 qershor 2026. Ndërkohë, afati final për pagesën e tatimit dhe dorëzimin e pasqyrave financiare të rideklaruara është data 30 qershor 2026.
Në posterin informues të publikuar nga DPT, përcaktohen edhe afatet për ligjin e faljes së detyrimeve tatimore. Pagesat për të përfituar nga skemat e faljes nisin më 10 qershor 2026.
Për detyrimet e periudhës 2015-2019, bizneset duhet të paguajnë menjëherë 50% të detyrimit principal deri më 30 qershor 2026 për të përfituar fshirjen e 50% tjetër. Gjithashtu, për deklaratat e padorëzuara deri më 31 dhjetor 2024, subjektet mund të përfitojnë faljen e gjobave për deklarim të vonuar.
Një tjetër afat i rëndësishëm është 30 nëntori 2026, datë deri në të cilën subjektet duhet të paraqesin pranë Drejtorive Rajonale Tatimore aktin e heqjes dorë nga ankimi.
Ndërsa deri më 31 dhjetor 2026, bizneset që paguajnë 75% të detyrimit principal mund të përfitojnë fshirjen e 25% të mbetur për detyrimet e periudhës 2015-2019. Për pagesën e plotë të principalit, bizneset përfitojnë edhe fshirjen e gjobave dhe kamatëvonesave për detyrimet e periudhës 2020-2024.
Sipas udhëzimit të publikuar nga Ministria e Financave dhe Drejtoria e Përgjithshme e Tatimeve, të gjitha aplikimet dhe rideklarimet do të kryhen online përmes sistemit “e-Filing”. Administrata tatimore ka theksuar se respektimi i afateve është thelbësor për përfitimin nga lehtësitë fiskale dhe procedurat e parashikuara në ligj.
AFATET KRITIKE
PAQJA FISKALE
15.05.2026
Nis aplikimi në sistemin tatimor “e-Filing” për lidhjen e Marrëveshjes së Paqes Fiskale për vitin tatimor 2026.
05.06.2026
Përfundon afati për aplikimin në sistemin tatimor “e-Filing” për lidhjen e Marrëveshjes së Paqes Fiskale për vitin tatimor 2026.
15.06.2026
Afati i fundit brenda të cilit subjektet që kanë aplikuar ditën e fundit (05.06.2026) duhet të ngarkojnë në sistemin tatimor “e-Filing” marrëveshjen e nënshkruar.
30.06.2026
Tatimpaguesit të cilët në formularin e aplikimit për lidhjen e Marrëveshjes së Paqes Fiskale, kanë deklaruar që do të kryejnë rideklarimin e pasqyrave financiare, duhet:
- Të kryejnë pagesën e tatimit për çdo vit tatimor për të cilin është ndryshuar deklarata tatimore.
- Të depozitojnë pranë Drejtorisë Rajonale Tatimore të juridiksionit formularin e aplikimit për rideklarimin e elementeve të veçanta të aktiveve, detyrimeve apo kapitaleve të veta të pasqyrave financiare vjetore.
- Të dorëzojnë në “e-Filing” pasqyrat financiare të rideklaruara.
- Të paraqesin sqarimet përkatëse për çdo ndryshim të kryer në pasqyrat financiare.
- Administrata Tatimore rezervon të drejtën për të kërkuar informacion shtesë.
FALJA E DETYRIMEVE TATIMORE
10.06.2026
Fillon pagesa e detyrimeve tatimore për të përfituar nga ligji i faljes.
30.06.2026
Afati i fundit:
- Për pagesën menjëherë të 50% të detyrimit principal, për të përfituar fshirjen e 50% të tij. Për detyrimet tatimore të periudhës 2015-2019.
Për dorëzimin e deklaratave të padorëzuara për periudhat deri më 31.12.2024, për të përfituar faljen e gjobave për deklarim të vonuar.
30.11.2026
Afati i fundit që kanë subjektet për të paraqitur pranë Drejtorisë Rajonale Tatimore përkatëse aktin e heqjes dorë nga ankimi.
31.12.2026
Afati i fundit:
- Për pagesën e 75% të detyrimit principal, për të përfituar fshirjen e 25% të tij. Për detyrimet tatimore të periudhës 2015-2019.
Për pagesën e 100% të principalit, për të përfituar fshirjen e gjobave dhe kamatëvonesave për detyrimet tatimore të periudhës 2020-2024.
Udhëzimi i Tatimeve: Aplikimet për Paqen Fiskale mbyllen më 5 Qershor, pas këtij afati do refuzohen
Postimi ” Tatimet publikojnë kalendarin e “Paqes Fiskale”, bizneset afat deri më 5 qershor për aplikimet ” eshte marre nga Revista Monitor.
