Bashkitë në vend kanë shënuar një rritje të ndjeshme të të ardhurave nga taksa e pasurisë gjatë gjashtëmujorit të parë të vitit, ndonëse performanca ka qenë e larmishme mes njësive vendore. Sipas të dhënave zyrtare të publikuara nga Ministria e Financave, gjatë kësaj periudhe janë arkëtuar në total 5.9 miliardë lekë, e barabartë me rreth 64 milionë euro.
Ky tregues shënon një kapërcim prej 1.2 miliardë lekësh, ose rreth 13 milionë eurosh, në krahasim me të njëjtën periudhë të vitit paraprak. Të dhënat sipas llojeve të taksës së pasurisë, ku përfshihen taksa mbi ndërtesën, mbi truallin, mbi tokën dhe mbi transaksionet e pasurive të paluajtshme, tregojnë se disa bashki janë dalluar për rezultatet e tyre.
Konkretisht, bashkia Tiranë ka arkëtuar më shumë të ardhura nga taksa e ndërtesës dhe ajo mbi transaksionet e pasurive të paluajtshme. Bashkia Vlorë ka regjistruar të ardhura më të larta nga transaksionet e pasurive, ndërsa Elbasani dhe Cërriku janë mbështetur kryesisht te taksa e ndërtesës. Nga ana tjetër, bashkia Vorë ka arkëtuar më shumë nga taksa e ndërtesës dhe transaksionet e pasurive, bashkia Patos nga taksa e ndërtesës, tokës bujqësore dhe truallit, kurse Himara nga taksa e ndërtesës dhe transaksionet e pasurive.
Në total, këto janë shtatë bashki nga 61 gjithsej që kanë shfaqur performancën më të lartë në këtë drejtim. Rritja e përgjithshme e të ardhurave ka ardhur edhe si rrjedhojë e zbatimit të ligjit për rivlerësimin e pasurive të paluajtshme. Vlen të theksohet se vetëm Bashkia Tiranë përbën 54.2% të totalit të arkëtuar në shkallë vendi, ndërsa taksa e pasurisë zë 17% të totalit të të ardhurave që pushteti vendor mbledh nga burimet e veta.
