Qeveria ka ndërmarrë nismën për ndryshimin e ligjit për sigurimin e depozitave, me qëllim forcimin e mbrojtjes për depozituesit, përmirësimin e efikasitetit në menaxhimin e skemës dhe garantimin e stabilitetit financiar gjatë situatave të krizës. Drafti i përgatitur është hedhur për konsultim publik nga Ministria e Financave.

Ndryshimet parashikojnë zgjerimin e bazës së depozitave të siguruara, rritjen e kufirit të mbulimit dhe lehtësimin e procedurave e afateve të kompensimit. Skema e re synon të përfshijë kategori që deri më tani janë përjashtuar, si drejtues dhe administratorë bankash bashkë me familjarët e tyre, aksionarë me të paktën 5% të kapitalit, organizata jofitimprurëse, fondacione, parti politike, njësi vendore, shkolla, spitale dhe grupe të tjera të specifikuara në ligj.

Një nga risitë më të rëndësishme është rritja graduale e mbulimit të depozitave bankare nga 2.5 milionë lekë në 6 milionë lekë. Për shoqëritë e kursim-kreditit ky nivel do të mbetet 2 milionë lekë deri në anëtarësimin e vendit në Bashkimin Evropian, kohë në të cilën mbulimi për të dyja këto kategori do të arrijë kundërvlerën e 100 mijë eurove në lekë.

Projektligji sjell gjithashtu mekanizma shtesë mbrojtjeje për llogaritë me balanca të përkohshme. Individët mund të përfitojnë kompensim deri në 15 milionë lekë nëse fondet janë transferuar ose janë bërë të transferueshme brenda gjashtë muajve para ngjarjes së sigurimit. Po ashtu, duke filluar nga 1 korriku 2027, propozohet një regjim i posaçëm për llogari që rrjedhin nga transaksionet e pasurive të paluajtshme për banim, trashëgimia, lindja, divorci, pensioni, largimi nga puna, dëmshpërblimet për dënime të padrejta penale, si dhe përfitimet nga sigurimet. Këto depozita do të kompensohen deri në 15 milionë lekë mbi nivelin standard, me kusht që ngjarja të ketë ndodhur brenda gjashtë muajve, ndërsa pas anëtarësimit në BE kjo shumë do të arrijë në 500 mijë euro.

Drafti parashikon përcaktimin e primeve vjetore bazuar te rreziku dhe niveli i synuar i fondeve, si dhe diversifikimin e burimeve të huamarrjes për Agjencinë e Sigurimit të Depozitave. Roli i Agjencisë do të zgjerohet për të mbështetur stabilitetin financiar, përfshirë pjesëmarrjen në kompensim kur Banka e Shqipërisë konstaton pamundësinë e disponimit dhe financimin e transferimit gjatë likuidimit të detyruar të një anëtari. Këto ndryshime përbëjnë pjesë të angazhimeve ndërinstitucionale për përmbushjen e detyrimeve të Kapitullit 9, Shërbimet Financiare, në procesin e integrimit evropian.