Hyrja në Bashkimin Europian kërkon që Shqipëria të përmbushë kushtet për auditimin e individëve të pasur me risk të lartë, forcimin e performancës së hetimit të mashtrimit tatimor, apo krijimin e regjistrit të aseteve për 10% të totalit të tatimpaguesve.
Drejtoria e Tatimeve bëri të ditur se në një takim pune të Drejtorit të Përgjithshëm të Administratës Tatimore, z. Ilir Binaj, me përfaqësues të Delegacionit të Bashkimit Europian në Shqipëri, ku u diskutua mbi ecurinë e katër objektivave të Planit të Rritjes (Growth Plan):
– Auditimi i individëve të pasur me risk të lartë, bazuar në të dhënat e vetëdeklaruara dhe informacionin
e siguruar nga palë të treta;
– Krijimi i regjistrit të aseteve për 10% të totalit të tatimpaguesve;
– Paraplotësimi i deklaratave të TVSH-së për të gjithë tatimpaguesit subjekt i TVSH-së, si dhe i deklaratës DIVA për individët deklarues, me qëllim thjeshtimin e proceseve dhe rritjen e përputhshmërisë;
-Forcimi i performancës së hetimit të mashtrimit tatimor.
Sipas njoftimit, Administrata Tatimore vijon angazhimin për përmbushjen e objektivave strategjikë, forcimin e administrimit tatimor dhe avancimin e reformave në funksion të standardeve europiane dhe procesit të integrimit.
Në pritje të paqes fiskale
Këto angazhime po merren ndërkohë që qeveria miratoi në fund të vitit të kaluar një projekt për paqen fiskale, i cili pritet të zbatohet së shpejti pas miratimit të udhëzimeve. Ligji “Për marrëveshjen e paqes Fiskale”, mundëson nënshkrimin e një marrëveshje mes biznesit të madh me të ardhura bruto mbi 14 mln lekë në vit dhe administratës tatimore për parapagimin e tatimfitimit.
Vullnetarisht në këtë marrëveshje me administratën tatimore, mund të hyjë çdo biznes i rregullt qoftë persona fizik apo entitet. Të përjashtuar nga e drejta për të hyrë në marrëveshje me administratën tatimore janë bizneset që ndaj tyre është hapur çështje penale për mashtrim apo evazion fiskal.
Pak ditë më parë, Agjencia e Inteligjencës Financiare (AIF) ka “ngritur” radarët për paqen fiskale.
Në një shkresë që u është dërguar subjekteve që raportojnë pranë saj, Agjencia e Inteligjencës Financiare, që është institucioni i cili shtron funksionet e autoritetit përgjegjës në përputhje me ligjin nr. 9917/2008 “Për parandalimin e pastrimit të parave dhe financimit të terrorizmit” i ndryshuar, ka paralajmëruar që të kenë kujdes me zbatimin e ligjit Nr. 84/2025 “Për marrëveshjen e paqes fiskale”.
AIF ka informuar të gjitha subjektet, se ligji “Për marrëveshjen e paqes fiskale”, nuk ofron asnjë lloj imuniteti administrativ ose penal ndaj veprimeve të tatimpaguesve për pastrimin e parave, financimin e terrorizmit apo për çdo vepër tjetër penale, që lidhet me origjinën e jashtëligjshme të fondeve apo pasurisë dhe për rrjedhojë nuk cenon zbatimin e asnjë prej detyrimeve të ligjit për parandalimin e pastrimit të parave.
Drafti për paqen fiskale është kundërshtuar nga institucionet ndërkombëtare, pasi ai shihet si një lloj amnistie e fshehur. Fondi Monetar Ndërkombëtar ka pohuar se disa prej elementeve të ligjit mund të minojnë progresin e fundit të Shqipërisë në administrimin e tatimeve dhe të krijojnë disa rreziqe për përmbushjen dhe drejtësinë fiskale.
Paqja është kundërshtuar dhe nga institucionet e mëdha të biznesit. Në dhjetor, pak para se Kuvendi të miratonte këtë ligji, Dhoma Amerikane, organizata që përfaqëson interesat e komunitetit të investitorëve amerikanë dhe shqiptarë, doli me një deklaratë të fortë kundër projektligjit “Për Marrëveshjen e Paqes Fiskale”.
Sipas vlerësimit professional të Dhomës, evidentohen një sërë problematikash me ndikim të gjerë juridik, ekonomik dhe të qeverisjes fiskale, që lidhen me faktorë të tillë si rrezik i lartë për cënimin e konkurrencës së ndershme; Mundësi reale për legalizimin e kapitalit me origjinë të dyshimtë dhe pastrim parash; Ulje të cilësisë së administrimit tatimor; Pasoja serioze ekonomike dhe fiskale në buxhetin e shtetit dhe nxitje të skemave të zhvendosjes së bizneseve drejt normave më të ulëta.
AFI paralajmëron grupet e interesit: Paqja Fiskale nuk ofron imunitet për pastrimin e parave
Postimi ” Teksa pritet paqja fiskale; Tatimet do auditojnë të pasurit në kuadër të planit të rritjes në BE ” eshte marre nga Revista Monitor.
