Banka e Shqipërisë synon të ndërtojë një kuadër të brendshëm për inteligjencën artificiale, në përputhje me standardet e Bashkimit Evropian duke garantuar një përdorim të përgjegjshëm, transparent dhe të sigurt të kësaj teknologjie.
Zëvendësguvernatorja e bankës së Shqipërisë, Olta Zaçaj theksoi se kjo teknologji paraqet mundësi të rëndësishme për rritjen e efikasitetit, përmirësimin e analizës së të dhënave dhe forcimin e proceseve mbikëqyrëse.
Këtë delaratë Znj. Zaçaj e bëri në Mbledhjen e Konstituencës së Fondit Monetar Ndërkombëtar (FMN) dhe të Grupit të Bankës Botërore (BB), e zhvilluar në Lisbonë, Portugali.
Takimi mblodhi së bashku guvernatorët e bankave qendrore, ministrat e financave dhe përfaqësues të lartë të vendeve anëtare të Konstituencës, me qëllim diskutimin e zhvillimeve më të fundit në ekonominë globale, sfidave me të cilat përballen ekonomitë e vendeve anëtare, si dhe prioriteteve të ardhshme të Fondit Monetar Ndërkombëtar dhe Grupit të Bankës Botërore.
Në fokus të diskutimeve ishin ndikimi i tensioneve gjeopolitike mbi ekonominë botërore, sfidat që lidhen me inflacionin, rritjen ekonomike dhe stabilitetin financiar, zhvillimet në fushën e inteligjencës artificiale, përdorimi i saj nga institucionet, si dhe ndikimi që ajo ka në tregun e punës dhe produktivitet. Gjithashtu, u diskutuan zhvillimet më të fundit në agjendën e FMN-së dhe të Bankës Botërore.
Fondi Monetar Ndërkombëtar dhe Grupi i Bankës Botërore prezantuan prioritetet strategjike, si dhe vlerësimet e tyre mbi perspektivën e ekonomisë botërore. Në veçanti, u theksua rëndësia e ruajtjes së stabilitetit makroekonomik, forcimit të qëndrueshmërisë së ekonomive ndaj goditjeve të jashtme dhe përshpejtimit të reformave strukturore për të mbështetur rritjen afatgjatë.
Gjatë diskutimeve, Zëvendësguvernatorja Zaçaj prezantoi zhvillimet më të fundit ekonomike në Shqipëri, duke nënvizuar se ekonomia shqiptare ka vijuar të shfaqë qëndrueshmëri përballë pasigurive të mjedisit të jashtëm. Ajo theksoi se rritja ekonomike mbetet solide, e mbështetur nga kërkesa e brendshme, turizmi dhe zgjerimi i kreditimit, ndërsa inflacioni vijon të luhatet pranë objektivit të Bankës së Shqipërisë.
Zj. Zaçaj theksoi rolin e Bankës së Shqipërisë në ruajtjen e stabilitetit të çmimeve dhe stabilitetit financiar, përmes një politike monetare të kujdesshme. Ajo nënvizoi gjithashtu se sektori bankar shqiptar vijon të karakterizohet nga një nivel i lartë kapitalizimi, likuiditet i mjaftueshëm dhe nivele historikisht të ulëta të kredive me probleme.
Zëvendësguvernatorja e Parë u ndal edhe te rëndësia e vijimit të reformave strukturore dhe përshpejtimit të procesit të integrimit evropian. Në këtë kuadër, ajo evidentoi përfitimet që po sjell operacionalizimi i transfertave SEPA, si një hap i rëndësishëm drejt integrimit financiar me Bashkimin Evropian.
Postimi ” Banka e Shqipërisë synon të ndërtojë një kuadër të brendshëm për inteligjencën artificiale ” eshte marre nga Revista Monitor.
