Thellimi i partneritetit strategjik mes Shqipërisë dhe Turqisë në fushën e mbrojtjes dhe sigurisë, si dhe orientimi i bashkëpunimit drejt projekteve konkrete me interes të ndërsjellë, ishin në qendër të vizitës zyrtare të Ministrit të Mbrojtjes, Ermal Nufi, në Ankara, ku u prit nga homologu i tij, Yaşar Güler.
Gjatë takimit, Ministri Nufi nënvizoi se “Shqipëria dhe Turqia ndajnë një partneritet të konsoliduar, të mbështetur në lidhje të forta historike dhe njerëzore, anëtarësimin e përbashkët në NATO dhe një bashkëpunim të qëndrueshëm në fushën e mbrojtjes e sigurisë.” Ai shprehu vlerësimin e Shqipërisë për kontributin e kahershëm të Turqisë në modernizimin e Forcave të Armatosura shqiptare, duke cilësuar rëndësinë e një bashkëpunimi gjithnjë e më praktik.
“Për më shumë se 20 vjet, kadetë, oficerë dhe nënoficerë shqiptarë kanë ndjekur akademi dhe programe trajnimi në Turqi, duke e bërë arsimin dhe trajnimin një nga shtyllat më të qëndrueshme të marrëdhënies dypalëshe në mbrojtje. Bashkëpunimi do të vijojë të fokusohet në modernizimin e FARSH, zhvillimin e kapaciteteve dhe rritjen e ndërveprueshmërisë, në përputhje me standardet dhe objektivat e NATO-s,” u shpreh Nufi.
Në fokus të bisedimeve ishte gjithashtu zgjerimi i bashkëpunimit me kompanitë turke përmes investimeve në Shqipëri dhe ndërmarrjeve të përbashkëta. “Shqipëria sheh potencial për transferim të përshtatshëm të teknologjisë dhe zhvillim të kapaciteteve vendase, duke krijuar mundësi të reja për industrinë shqiptare të mbrojtjes,” theksoi ministri.
Gjatë takimit u vlerësua edhe kontributi i Turqisë në KFOR dhe mbështetja për kontingjentin shqiptar në EUFOR ALTHEA. Të dy ministrat ndanë bindjen për intensifikimin e përpjekjeve drejt një programi më të strukturuar bashkëpunimi praktik, me projekte konkrete dhe rezultate të matshme për sigurinë dhe stabilitetin euroatlantik.
